Tags-Rural

sahrā meñ bhī gā.ūñ kā dariyā saath rahā
dekho mere paaoñ abhī tak giile haiñ

usī ke gaañv kī rāhoñ meñ baiTh kar har roz
maiñ dil kā haal havā ko sunā diyā kartā

chhūT saktī hai tire gaañv kī miTTī mujh se
ye qayāmat bhī kisī roz guzar saktī hai

ik nadī ke kināre base gaañv meñ guzrā bachpan mirā chāñd kī chhāñv meñ
ham baḌe jab hue ajnabī ho ga.e dil ke mandir kī sab deviyāñ so ga.iiñ

use jo dhuup liye dil ke gaañv meñ utrā
rahaT se chaah kā paanī pilāne vaalī huuñ

mere gaañv ke log bhī kitne bhole-bhāle haiñ
aaj bhī un ko jādū-Tonā achchhā lagtā hai

gaañv meñ dekho zarā kis niiñd meñ sab chal rahe haiñ
TuuT kar saare makāñ khañDar ke paikar Dhal rahe haiñ

maiñ ā.īne meñ ḳhud ko khojtā huuñ
ye gaañv kab kā ḳhālī ho chukā hai

gaañv se jo ḳhvāb uThā kar niklā thā
shahr meñ aa kar bhuul gayā pagDanDī ko

jis baat kā matlab ḳhushbū hai har gaañv ke kachche raste par
us baat kā matlab badlegā jab pakkī saḌak aa jā.egī

ḳhvāb ke gaañv meñ pale haiñ ham
paanī chhalnī meñ le chale haiñ ham

ab vo bargad hai na vo panghaT na ab vo gopiyāñ
aise pas-manzar meñ kyā gaañv kā manzar dekhnā

gaate hue peḌoñ kī ḳhunuk chhāñv se aage nikal aa.e
ham dhuup meñ jalne ko tire gaañv se aage nikal aa.e

kisī ko gaañv se pardes le jā.egī phir shāyad
uḌātī rail-gāḌī Dher saarā phir dhuāñ aa.ī

lauT kar ā.ūñgā phir gaañv tumhāre ik din
apne darvāze pe ik diip jalā.e rakhnā

jo mere gaañv ke khetoñ meñ bhuuk ugne lagī
mire kisānoñ ne shahroñ meñ naukrī kar lī

tairne joḌe batoñ ke ab yahāñ aate nahīñ
gaañv meñ paanī se ḳhālī ho gayā tālāb bhī

tum ne dil-nagrī ko ujḌā huā gaañv jaanā
varna ik shahr thā is gaañv ke pīchhe pīchhe

shukriya bazāriyat kī raushnī kā shukriya
gaañv kī pagDañDiyāñ bāzār kī bāteñ kareñ

kachche gharoñ ke gaañv meñ barsāt rah ga.ī
pakkī saḌak banī bhī to pakke makān tak