Tags-Ruswai

kaun kahtā hai bulandī pe nahīñ huuñ 'sāgar'
merī me.arāj-e-mohabbat mirī rusvā.ī hai

justujū un kī dar-e-ġhair pe le aa.ī hai
ab ḳhudā jaane kahāñ tak mirī rusvā.ī hai

is shahr meñ to kuchh nahīñ rusvā.ī ke sivā
ai 'dil' ye ishq le ke kidhar aa gayā tujhe

muqayyad ho ke kab tak kaun rahtā hai ki 'mehdī'
galī-kūchoñ tak āḳhir aa ga.ī rusvā.ī merī

kyā naam batā.eñ ham us kā nāmoñ kī bahut rusvā.ī hai
kuchh ab ke bahār-e-tāza-nafas ik daur-e-vafā be-nām chale

kyā ġharaz hai mirī taqdīr ko mujh se pūchhe
aabrū kā hai talabgār ki rusvā.ī kā

kyā chhupe raaz ilāhī dil-e-shaidā.ī kā
arsa-e-hashr to bāzār hai rusvā.ī kā

dekhne hī na diyā un ko 'rishī' mahfil meñ
kuchh tahayyur ne kuchh andesha-e-rusvā.ī ne

kyuuñ huā mujh ko ināyat kī nazar kā saudā
aaj rusvā.ī hī rusvā.ī hai kuchh aur nahīñ

na qurb-e-zāt hī hāsil na zaḳhm-e-rusvā.ī
ajiib lagtā hai ab ḳhud se rābta rakhnā

achchhī-ḳhāsī rusvā.ī kā sabab hotī hai
dūsrī aurat pahlī jaisī kab hotī hai

koī ilzām koī tanz koī rusvā.ī
din bahut ho ga.e yāroñ ne ināyat nahīñ kī

ḳhauf-e-rusvā.ī ne mujh ko aah bhī bharne na dī
lab tak aa.ī bhī to un kā naam ho kar rah ga.ī

kab havas hai mujh ko rusvā.ī kī lekin kyā karūñ
khīñch kar laatī hai is kūche meñ lāchārī mujhe

apne the begāne the aur āḳhir meñ ḳhud merī zaat
kis kis kā ikrām huā hai kitnā mirī rusvā.ī meñ

tujhī ko DhūñDhtā phirtā thā dar-ba-dar phir bhī
mujhe yaqīn thā rusvā.ī kū-ba-kū hogī

har zabāñ par mirī rusvā.ī kā afsāna hai
nusḳha-e-shauq pareshāñ na huā thā so huā

siyāhī dil kī phūTegī to phir nas nas se phūTegī
ġhulāmo ye na samjho dāġh-e-rusvā.ī jabīñ tak hai

maiñ sarāpā jurm jannat se nikālā to gayā
Darte Darte pūchhtā huuñ kis kī rusvā.ī huī

ḳhud rahe ta.an-o-malāmat kā hadaf us pe kabhī
apnī rusvā.ī kā ilzām na dharnā chāhe