Tags-Ruswai

nochtī kab tak raheñgī yuuñ barahna ḳhvāhisheñ
tā-ba-kai hotī rahegī aisī rusvā.ī ki bas

jhuuT kī miqdār kam hai aur sachchā.ī bahut
sāf-goī se huī hai merī rusvā.ī bahut

har roz ke dhoke rāhoñ meñ
har roz jabīñ par rusvā.ī

pī ke bahkegā to rusvā.ī-e-mahfil hogī
vo jo kam-zarf hai maiḳhāne meñ aayā kyuuñ hai

merī hī badaulat vo mash.hūr-e-do-ālam haiñ
rusvā.ī-e-ulfat ye un ke baḌe kaam aa.ī

thī jo rusvā.ī ho chukī 'bedār'
pās-e-nāmūs-o-nañg kyā hai ab

husn bhī hai maslahat-bīñ ishq bhī duniyā-shanās
aap kī shohrat ga.ī yāroñ kī rusvā.ī ga.ī

vo bhī bigḌā, huī rusvā.ī bhī
jān-levā hai shanāsā.ī bhī

is se pahle bhī ka.ī baar mile the lekin
shauq dildāda-e-rusvā.ī nahīñ thā itnā

ravāñ ho kis tarah se chāhatoñ kā kārvāñ apnā
hameñ rusvā.ī kā Dar hai baġhāvat vo nahīñ karte

avval-e-ishq meñ ḳhabar bhī na thī
izzateñ baḳhshtī hai rusvā.ī

shahroñ shahroñ mirī rusvā.ī kā shohrā pahuñchā
mujh sā duniyā meñ koī āshiq-e-bad-nām nahīñ

pyaar karne bhī na paayā thā ki rusvā.ī milī
jurm se pahle hī mujh ko sañg-e-ḳhamyāza lagā

jin ke liye mar mar ke jiye ham kyā paayā un se 'manzūr'
kuchh rusvā.ī kuchh badnāmī ham ko milī sauġhāt ke naam

dil-e-betāb kā isrār maane sharm-e-rusvā.ī
bachā kar sab kī nazreñ sū-e-jānāñ dekh lete haiñ

āshiqoñ kuuñ nahīñ hai rusvā.ī
mus.haf-e-ishq kī hai ye tafsīr

shā.istagān-e-shahr meñ mat kījiye shumār
mardūd-e-ḳhalq huuñ mujhe rusvā.ī chāhiye

tum ne likkhā hai mire ḳhat mujhe vāpas kar do
Dar ga.iiñ husn-e-dil-āvez kī rusvā.ī se

apnī rusvā.ī tire naam kā charchā dekhūñ
ik zarā sher kahūñ aur maiñ kyā kyā dekhūñ

thī 'mohsin' ye bhī jins-e-nā-mubārak
huī shohrat kī rusvā.ī to jaanā