Tags-Ruswai

bahut kyuuñ ho na rusvā.ī hamārī
yahī to hai kamā.ī umr bhar kī

ye kahiye lauh-e-jabīñ par hai dāġh-e-rusvā.ī
zamāne vaale hameñ ḳhaak meñ milā dete

kahīñ ghuñghaT ke paT kanhā.ī kahīñ bastī meñ rusvā.ī
kahīñ hoñT kī khoñT pe murlī kī dhun kahīñ hirdai meñ hañgāma

raaz meñ rakh tirī rusvā.ī kā qissa maiñ huuñ
mujh ko pahchān tirā dūsrā chehra maiñ huuñ

kaise kah duuñ ki mujhe chhoḌ diyā hai us ne
baat to sach hai magar baat hai rusvā.ī kī

maiñ baḌhā.uñgā tirī shohrat-e-ḳhush-bū kā nikhār
tū duā de mire afsāna-e-rusvā.ī ko

vaj.h-e-rusvā.ī-e-ehsās huā hai kyā kyā
haa.e vo lafz jo lab tak mire aayā bhī nahīñ

mohtaram kah ke mujhe us ne pashemān kiyā
koī pahlū na milā jab mirī rusvā.ī kā

chhalak paḌeñ na kahīñ ashk merī āñkhoñ se
kisī ke dard-e-mohabbat kī ho na rusvā.ī

ishq aur rusvā.ī kaun sī na.ī shai hai
ishq to azal se thā rusvā-e-jahāñ apnā

ab to shubhe bhī mujhe dev nazar aate haiñ
us zamāne meñ parī-zād thī rusvā.ī bhī

pās-e-rusvā.ī se dekho paas aa sakte nahīñ
raat aa.ī niiñd kā tum ko bahāna ho gayā

sahrā kī chhāntā hai vo ḳhaak ḳhaak zarra
ik ajnabī sā ġham hai rusvā.ī chāhtā hai

un kī rāteñ ḳhauf-e-rusvā.ī se hoñgī jab darāz
tere siine meñ kisī shab kā na hogā koī raaz

har dar-o-dīvār par likkhā huā hai merā naam
vaj.h-e-shohrat ban ga.e haiñ kitne rusvā.ī ke rañg

merī rusvā.ī meñ vo bhī haiñ barābar ke sharīk
mere qisse mire yāroñ ko sunātā kyā hai

rusvā.ī hai to ye bhī gavārā na kījiye
ya.anī pas-e-ḳhayāl bhī aayā na kījiye

māna-e-jalvagarī ḳhauf hai rusvā.ī kā
bas usī par tumheñ da.avā hai zuleḳhā.ī kā

kisī kā pās-e-rusvā.ī kahāñ tak
galā ghuTne lagā zabt-e-fuġhāñ se