Tags-Ruswai

ġharq-e-dariyā honā yaaro 'ġhālib' ne kyuuñ chāhā āḳhir
aisī marg-e-lā-vāris meñ socho to rusvā.ī bahut hai

charḳh aapas ke ta.alluq kā ye andāz bhī dekh
kar diyā un ko bhī rusvā mirī rusvā.ī ne

tū ne 'hasrat' kī ayaañ tahzīb-e-rasm-e-āshiqī
is se pahle e'tibār-e-shān-e-rusvā.ī na thā

ishq-bāzī aur shai hai fisq hai kuchh aur chiiz
nek-nāmī ko na kah 'parvīñ' ki rusvā.ī huī

ham ne rusvā.ī kī us vaqt se chādar oḌhī
jis ghaḌī toḌ diyā thā tire dar se rishta

apnā ġham ab ḳhud hī uThā le varna rusvā.ī hogī
terā bhed chhupā kar dil meñ nāhaq bojh uThā.e kaun

aisī uljhan ho kabhī aisī bhī rusvā.ī ho
dil ke har zaḳhm meñ dariyāoñ sī gahrā.ī ho

rusvā.ī ki shohrat kuchh jaano hurmat ki malāmat kuchh samjho
'tābāñ' hoñ kisī unvān sahī hote haiñ mire charche bhī bahut

jo zabāñ par lā na sakte the ayaañ sab par huā
fan hamārā bā.is-e-tazhīk-o-rusvā.ī huā

zauq-e-dīdār-e-tamāshā-bār rusvā.ī huā
ḳhud tamāshā ban gayā jo bhī tamāshā.ī huā

ik zarā tum se shanāsā.ī huī
shahr-bhar meñ merī rusvā.ī huī

kisī din merī rusvā.ī kā ye kāran na ban jaa.e
tumhārā shahr se jaanā mirā bīmār ho jaanā

vaj.h-e-rusvā.ī hai 'nātiq' mastī-e-bazm-e-suḳhan
bāda-paimā haiñ ba-jām-e-ġhālib-e-mastāna ham

ḳhair badnām to pahle bhī bahut the lekin
tujh se milnā thā ki par lag ga.e rusvā.ī ko

is qadar shauq dar-āmad hai 'muzaffar' ham ko
sochte rahte haiñ rusvā.ī kahāñ se aa.e

utar jaatā to rusvā.ī bahut hotī
ki sar kā bojh bhī dastār jaisā thā

bagūle sā uḌātā dhuul 'uzlat' vajd kartā hai
sar-e-bāzār rusvā.ī meñ ḳhalvat is ko kahte haiñ

ho rahī hai dar-ba-dar aisī jabīñ-sā.ī ki bas
kyā abhī baaqī hai koī aur rusvā.ī ki bas

kaun jaane vo hasīñ thā ki tamannā merī
DhūñD laa.ī thī kahīñ se mirī rusvā.ī ko

tujh ko maiñ chāhtī huuñ aur mujhe ma.alūm hai ye
raaz khul jaa.e to donoñ hī kī rusvā.ī hai