Tags-Sach

jo sach hī bechnā paḌe to mol-bhāo kyā kareñ
haiñ aks aks aa.ine to rakh-rakhāv kyā kareñ

sach to ye hai ki use dhuup ne garmāyā thā
haañ vo paudā jo tirī chhāñv meñ kumhlāyā thā

ye alag baat ki alfāz haiñ mere lekin
sach to bas ye hai ki terī hī sadā hai mujh meñ

kahtā thā 'arsh' sach meñ samajhtā thā jhuuT yaar
kartā rahā hai haq ko vo bātil tamām raat

vo jo nuqsān kī mānind mujhe lagtā hai
sach to ye hai ki vahī ek nafā achchhā thā

āñkheñ in rozoñ meñ sach kahiyo laḌā.eñ kis se
be-tarah jhamke hai kuchh dīda-e-maḳhmūr tirā

hamesha sach ugalvātā rahā hai
tabhī tārīf-e-bāda kar rahā huuñ

sach hai yuuñ to ġham bahut the qaid kar paa.e nahīñ
āsmāñ sar pe khulā thā dil ye be-par bhī na thā

be-ḳhauf jo sach boltā rahtā hai hamesha
vo aa.ina apnā maiñ badalne kī nahīñ huuñ

jis ne pyaar se dekhā us ke saath huā
sach pūchho to maiñ bhī ab tak bachcha huuñ

qayāfa pārsā.ī kā banā kar
tū sach meñ pārsā ho jā.egā kyā

to ye jaan lete ki sach hai kyā ye jo fard-e-jurm hai sab ġhalat
vo jo paḌh ke matn hī rah ga.e kabhī hāshiya bhī to dekhte

mirī baat sach hai
mirī baat sach hai nahīñ hai kisī jañg kā ye fasāna

mujhe shak kī nazroñ se kyuuñ dekhte ho
mirī baat sach hai

sach ko tum qatl kar na pāoge
chāhe jitnī gavāhiyāñ de do

kyūñki ā.īna sach batā degā
is liye us ko toḌ kar rakkhā

ye sach hai rañg badaltā thā vo har ik lamha
magar vahī to bahut kāmyāb chehrā thā

sach bahut sajtā thā merī zaat par
aaj ye kapḌā bhī chhoTā ho gayā

nahīñ maslahat ki rahbar koī baat sach batā de
zarā kārvāñ se pūchho jo shikast jo thakan hai

ye bhī durust hai ki payambar nahīñ huuñ maiñ
hai ye bhī sach ki merā kahā hone vaalā hai