Tags-Sach

ye to sach hai ki TuuTe phūTe haiñ
mere bachpan ke ye khilaune haiñ

dekh ā.īna ham se pūchhe the yuuñ
sach kahiyo ki kaise haiñ hasīñ ham

ye baat sach hai ki vo zindagī nahīñ merī
magar vo mere liye zindagī se kam bhī nahīñ

amn kī tāqat ko kuchlā sach ko rusvā kar diyā
dushmanoñ ke chār-din meñ vāre-nyāre ho ga.e

tujh ko shikva hai ki ushshāq ne badnām kiyā
sach to ye hai ki tirā husn hai dushman terā

bulbul kī fuġhāñ par ḳhanda-zanī ġhunchoñ ne jo kī pazhmurda hue
sach hai ki hazīn-o-ġham-zada ho hañsne kā ba-ḳhair anjām nahīñ

sach ḳhud se bhī ye log nahīñ bolne vaale
ai ahl-e-junūñ tum yahāñ bekār meñ aa.e

haañ ye sach hai sar-ba-sar kho.e ga.e haiñ aql-o-hosh
dil meñ dhaḌkan hai abhī dil to hai ḳhud-muḳhtār abhī

ye aur baat ki kam-hausla to maiñ bhī thī
magar ye sach hai use pahle maiñ ne chāhā thā

sach to ye hai ki duā ne na davā ne rakkhā
ham ko zinda tire dāman kī havā ne rakkhā

baat umūman kartā rahtā hai sach kī
jaldī hī vo tanhā hone vaalā hai

sach to kahtā hai dost dushman hai
ham ne nāseh kī āzmā.ī baat

farz karo tumheñ ḳhush karne ke DhūñDhe ham ne bahāne hoñ
farz karo ye nain tumhāre sach-much ke mai-ḳhāne hoñ

chhupā.ūñ aa.ine se kyā haqīqat
baḌā kam-baḳht hai sach boltā hai

dil nazr-o-dīda-pesh-kash ai bā.is-e-hayāt
sach kah ki jī lage hai tirā kis makān meñ

fasl ho jaa.e to baḌhtī hai ḳhushī se duurī
aap kā qurb ye sach hai baḌe ārām kā hai

kyā ḳhush aa.ī hai dilā manzil-e-hastī tujh ko
sach batā yaañ se tirā azm-e-safar hai ki nahīñ

kaun sach boltā hai zālim-o-jābir ke ḳhilāf
kaam duniyā meñ ye be-ḳhauf-o-ḳhatar ham ne kiyā

sach to ye hai sab ko apnī jaan pyārī hai yahāñ
uḌ ga.e saare parinde peḌ kaTtā dekh kar

tum mire saath ho ye sach to nahīñ hai lekin
maiñ agar jhuuT na bolūñ to akelā ho jā.ūñ