Tags-Sach

sach kaho shaam kī āvāra havā ke jhoñko
us kī ḳhushbū ke ta.āqub meñ kidhar jāoge

peT kī bhuuk sach-much jahannam kā tanūr hai
lekin is bhuuk kā kyā mudāvā kareñ

vo samajhtā thā ki haiñ sach ke ḳharīdār bahut
rah gayā maal sabhī us kī dukāñ meñ rakkhā

sach ke liye ham aaj ke suqrāt ban ga.e
piite haiñ jaam zahr kā apnī ḳhushī se ham

jis ne merā saath chhoḌā aur kisī kā ho gayā
sach to ye hai mujh se bhī baḌh kar vo tanhā ho gayā

ye sach hai ki bande ko ḳhudā dahr meñ yuuñ to
maanā nahīñ jaatā hai magar maan rahe haiñ

paise kā pujārī duniyāñ meñ sach pūchho to insāñ ho na sakā
daulat kabhī īmāñ lā na sakī sarmāya musalmāñ ho na sakā

sach kī ik nannhī sī koñpal ko kuchalne ke liye
jhuuT aur dushnām ke lashkar ke lashkar chāhiye

sher kahte haiñ chhoḌ kar sab kaam
yaar sach-much ajiib haiñ ham to

har manzil meñ har raste meñ sach apne kaam aayā hai
ham ne jhūTe logoñ ko aksar ghar tak pahuñchāyā hai

sach kaho sach kaho hamesha sach
hai bhale-mānasoñ kā pesha sach

kyā maza ho haath meñ zulfeñ hoñ aur yuuñ pūchhiye
ai mirī jaañ sach kaho to kitnī ab aa.ī hai raat

ā.īna jab vo dekhe to kahtī haiñ chitvaneñ
sach hai ki ham sā kab koī insāñ hai dūsrā

mere har jhuuT ko duniyā ne sarāhā lekin
ek sach marhala-e-dār talak le aayā

sach to ye hai 'majāz' kī duniyā
husn aur ishq ke sivā kyā hai

qabr meñ ab kisī kā dhyān nahīñ
sach hai jab jī nahīñ jahān nahīñ

zindagī jab se shanāsā-e-muhāllāt huī
sach to ye hai ki ḳhud apne se mulāqāt huī

kyā jaane kis adā se liyā tū ne merā naam
duniyā samajh rahī hai ki sach-much tirā huuñ maiñ

kyā ḳhush-nasībī hai mirī maiñ ek tanhā fauj huuñ
jhuuT aur sach kī jañg meñ kaam aa gayā lashkar mirā

kahāniyoñ ne mirī ādateñ bigāḌ dī thiiñ
maiñ sirf sach ko zafar-yāb dekh saktā thā