Tags-Sach

aaj vo phuul banā husn-e-dil-ārā dekhā
sach huā pichhle baras jo bhī kahā thā dekhā

ye to sach hai ki nahīñ apne garebāñ kī ḳhabar
terā dāman to ka.ī baar siyā hai maiñ ne

iltifāt-e-yār thā ik ḳhvāb-e-āġhāz-e-vafā
sach huā kartī haiñ in ḳhvāboñ kī ta.abīreñ kahīñ

agar sach itnā zālim hai to ham se jhuuT hī bolo
hameñ aatā hai patjhaḌ ke dinoñ gul-bār ho jaanā

zarā sā sach bhī kisī se kahā nahīñ jaatā
zarā sī baat pe gardan hamārī kaTtī hai

ham un ke sāmne sach bolne ke mujrim haiñ
hamīñ pe vaqt kī saarī ināyateñ hoñgī

sach kā lamha jab bhī nāzil hotā hai
kitnī uljhan meñ apnā dil hotā hai

yaqīn karne lage log rut badaltī hai
magar ye sach bhī karishma na ho ḳhitābat kā

faisla the vaqt kā phir be-asar kaise hue
sach kī peshānī pe ham jhūTī ḳhabar kaise hue

ye sach hai baham us kī mohabbat bhī nahīñ thī
aur tark marāsim hoñ ye himmat bhī nahīñ thī

sach hai ehsān kā bhī bojh bahut hotā hai
chaar phūloñ se dabī jaatī hai turbat merī

sach to ye hai jahāñ meñ mere ba.ad
naġhme din raat yūñhī barseñge

zindagī ek safar hai sach hai
ho gumāñ koī magar ho kyūñkar

tum ne kahā to zahar bhī piinā paḌā mujhe
ab is se baḌh ke duuñ tumheñ sach kā subūt kyā

maiñ na jiitā huuñ na martā huuñ sisaktā huuñ paḌā
jhuuT sach qasmeñ tumhāre sāmne khāte haiñ log

sach hai ab ham apnī apnī duniyāoñ meñ gum rahte haiñ
ye bhī sach ham donoñ bilkul tanhā jiinā siikh ga.e haiñ

agar ḳhudā na kare sach ye ḳhvāb ho jaa.e
tirī sahar ho mirā āftāb ho jaa.e

ġhalat kahūñ to mirī āqibat bigaḌtī hai
jo sach kahūñ to ḳhudī be-naqāb ho jaa.e

donoñ ko is jahān meñ sach kī talāsh thī
itnā bahut thā ham meñ rifāqat ke vāste

ye sach hai ab āzād haiñ ham
miTTī se sugandh ye aatī hai