Tags-Sach

sach to kah duuñ magar is daur ke insānoñ ko
baat jo dil se nikaltī hai burī lagtī hai

DhūñDhne se yuuñ to is duniyā meñ kyā miltā nahīñ
sach agar pūchho to sachchā āshnā miltā nahīñ

sach baat kahnā jab se shurūa maiñ ne kar diyā
tab se khaḌā maiñ jaise kisī karbale meñ huuñ

jhūTī gavāhiyoñ kī badaulat vo bach gayā
sach boltā huā maiñ abhī kaTghare meñ huuñ

vo hichkiyoñ se rotā rahā aur maiñ chup rahā
shāyad ye sach hai mujh ko mohabbat nahīñ rahī

lab kuchh bhī kaheñ is se haqīqat nahīñ khultī
insān ke sach jhuuT kī pahchān haiñ āñkheñ

jo baat sach hai nahīñ kholnī zamāne par
taḳhaiyyulāt ko husn-e-bayāñ banānā hai

sach ke dhāge se jo bane rishta
umr bhar ustuvār rahtā hai

jo ḳhushāmad kare ḳhalq us se sadā raazī hai
sach to ye hai ki ḳhushāmad se ḳhudā raazī hai

qissoñ ko sach mānñe vāle, dekh liyā anjām?
pāgal jhuuT kī tāqat se Takrāne baiThā thā

us ke kūche ko tū ai aah ġhanīmat hī samajh
sach to ye hai nahīñ itnā bhī asar aur kahīñ

maiñ jhuuT sach bhī yak-dam aañsū na un ke poñchhe
jo chashm roz-o-shab haiñ ḳhūñ-bār terī ḳhātir

ye baat sach hai ki begār to nahīñ ye hayāt
ki ham ko zaḳhm-e-tamannā mile haiñ ujrat meñ

kyuuñ sach ye kahā us ne ki ulfat nahīñ mujh se
ye aib hī zālim meñ ki dam-bāz nahīñ hai

jis ne 'āmir' matā-e-ḳhudī bech dī sach ye hai ismat-e-zindagī bech dī
sar jhukāne se behtar hai sar dījiye bhiik lene se behtar hai mar jā.iye

masal sach hai bashar kī qadar ne.amat ba.ad hotī hai
sunā hai aaj tak ham ko bahut vo yaad karte haiñ

husn teraa Guruur meraa thaa
sach to ye hai qusuur meraa thaa

asar meñ huuñ tumhāre ye to sach hai
magar itnā gumāñ achchhā nahīñ hai

maiñ sach se rū-ba-rū ho jā.ūñ kaise
mire kamre meñ ā.īna nahīñ hai

hāl-e-marg-e-be-kasī sun kar asar koī na ho
sach to ye hai aap sā bhī be-ḳhabar koī na ho