Tags-Sach

zahr shīrīñ hai sach piye jaao
hamdamo mar ke bhī jiye jaao

sach to ye baat hai ai 'aish' ki paate haiñ yahāñ
tere ash.ār meñ tarz-e-suḳhan-e-'mīr' kī bū

sach koī fan to nahīñ hai jo sikhāyā jaa.e
jhuuT se kaam le sach bolnā aa jā.egā

kis liye mujh ko na suulī pe chaḌhāyā jaatā
munsifoñ ne ye mire sach kī sazā rakkhī thī

to kyā sach-much judā.ī mujh se kar lī
to ḳhud apne ko aadhā kar liyā kyā

ye to sach hai ki ham tujhe pā na sake tirī yaad bhī jī se bhulā na sake
tirā daaġh hai dil meñ charāġh-e-sifat tire naam kī zeb-e-gulū-kafnī

ai ishq ba-qaul-e-'dard' sach hai
kuchh laa.e na the ki kho ga.e ham

kitne chehroñ ke rañg zard paḌe
aaj sach bol kar himāqat kī

agar sach hai sachchā.ī hotī hai uryāñ
maiñ uryāñ barahna khulā aadmī huuñ

jhuuT buniyād hī nahīñ rakhtā
rū-ba-rū sach se sab ko hone do

ye sach hai qasīda na 'hilāl' ek bhī likkhā
ye sach hai ki maiñ shaah kā naukar bhī nahīñ thā

ye sab ġhalat hai ki suntā nahīñ kisī kī vo
ye sach nahīñ ki pukārā to rab nahīñ aayā

jis ne pyaar se dekhā us ke saath huā
sach pūchho to maiñ bhī ab tak bachcha huuñ

ye sach hai yahāñ shor ziyāda nahīñ hotā
ghar-bār ke bāzār maiñ par kyā nahīñ hotā

ḳhvāb sach karne chalā thā gaañv se maiñ shahr ko
niiñd bhī kho kar yahāñ 'ālok' pachhtātā huuñ maiñ

vo jo ik ā.īna sā lagtā hai
sach to ye hai ki rū-ba-rū bhī nahīñ

fareb-e-ahd-e-mohabbat kī sādgī kī qasam
vo jhuuT bol ki sach ko bhī pyaar aa jaa.e

ye samajh ke maanā hai sach tumhārī bātoñ ko
itne ḳhūb-sūrat lab jhuuT kaise boleñge

vo ik sāneha ham na jise kah paa.e ab tak guzrā jab
kaise kaise dil se chāhā thā ki na sach ho lekin thā

hazār harf-e-zabāñ-soz darmiyāñ aa.e
hai sach to ye ki mohabbat meñ vo mazā na rahā