Tags-Sach

bahādur maiñ banūñ jitnī magar ye bhī hai sach 'iqrā'
ki ab maiñ mar to saktī huuñ pa tujh ko kho nahīñ saktī

maiñ jise apnī zindagī samjhā
sach to ye hai vo merī thī hī nahīñ

faqīr laḌkī huuñ mere liye mire ḳhāliq
jo sach kahūñ jo diyā tū ne haañ ziyāda hai

vo ga.e din jo chaman-zār meñ dil lagtā thā
sach hai yaksāñ nahīñ rahtā hai zamānā hargiz

mahsūs ho rahā hai jo ġham merī zaat kā
sach pūchhiye to dard hai vo kā.enāt kā

kisī ne sach kahā hai ik tamāshā-gāh hai duniyā
khilaunoñ kī magar chābī ḳhudā ke haat hotī hai

ye sach hai us se bichhaḌ kar mujhe zamāna huā
magar vo lauTnā chāhe to phir zamāna bhī kyā

sach ke qasbe pe miyāñ jhuuT kī sardārī hai
ab aTakte haiñ laboñ par hī ḳhulāse kitne

ḳhudā ne jo kuchh kahā hai
sach hai

khulā hai jhuuT kā bāzār aao sach boleñ
na ho balā se ḳharīdār aao sach boleñ

bajā ki ḳhū-e-vafā ek bhī hasīñ meñ nahīñ
kahāñ ke ham bhī vafādār aao sach boleñ

tamām shahr meñ kyā ek bhī nahīñ mansūr
kaheñge kyā rasan-o-dār aao sach boleñ

sunā hai vaqt kā hākim baḌā hī munsif hai
pukār kar sar-e-darbār aao sach boleñ

'qatīl' jin pe sadā pattharoñ ko pyaar aayā
kidhar ga.e vo gunahgār aao sach boleñ

hameñ gavāh banāyā hai vaqt ne apnā
ba-nām-e-azmat-e-kirdār aao sach boleñ

chhupā.e se kahīñ chhupte haiñ daaġh chehre ke
nazar hai ā.ina-bardār aao sach boleñ

sukūt chhāyā hai insāniyat kī qadroñ par
yahī hai mauqa-e-iz.hār aao sach boleñ

jo vasf ham meñ nahīñ kyuuñ kareñ kisī meñ talāsh
agar zamīr hai bedār aao sach boleñ

varna to ham manzar aur pas-manzar meñ uljhe rahte
ham ne bhī sach maan liyā jo kuchh dikhlāyā āñkhoñ ne

ishq meñ kaun batā saktā hai
kis ne kis se sach bolā hai