Tags-Sach

sab ne paḌh rakkhā thā sach kī jiit hotī hai magar
thā bharosa kis ko sach par sach ko sach kahtā to kaun

yaad thā 'suqrāt' kā qissa sabhī ko 'ehtirām'
sochiye aise meñ baḌh kar sach ko sach kahtā to kaun

va.ada visāl kā na koī sach kiyā kabhī
tum ko bhī jhuuT bolne kā ho gayā maraz

be-dār-o-visāl na ye jā.egā maraz
sach hai firāq-e-yār kā hai jāñ-guzā maraz

ham agar sach ke unheñ qisse sunāne lag jaa.eñ
log to phir hameñ mahfil se uThāne lag jaa.eñ

zamāna aap ko āshiq-navāz kahtā hai
ye sach bhī ho to kabhī ham ko kuchh atā na huā

chuuk āñkhoñ se huī hai yahī sach hai varna
koī ghāyal na ho jab tiir kamāñ se nikle

sach hai 'bedār' vo hai āfat-e-jān
ham ne bhī qissa-muḳhtasar dekhā

sach meñ kamzor hai bīnā.ī hamārī lekin
ret ke zarre ko sīmāb nahīñ kah sakte

ye sach nahīñ ki tamāzat se Dar ga.ī hai nadī
sukūn-e-dil ke liye apne ghar ga.ī hai nadī

ab to aisā lagtā hai
sach bhī jaise sachchā nahīñ

bas ruuh sach hai baaqī kahānī fareb hai
jo kuchh bhī hai zamīnī zamānī fareb hai

bas ek lamhe ke sach jhuuT ke evaz 'farhat'
tamām umr kā ilzām le gayā mujh se

jhuuT kī dīvār se laTke hue jismoñ ke din
ho ga.e puure ki sach to shab meñ bhī sotā nahīñ

kyā vo panne sach-much kore hote haiñ
jin par koī zarb lagā.ī jaatī hai

yuuñ to apne hī andar kā sach aur vo sach hai are tā-abad tujh ko kaafī hai
kal kī jānib se is be-yaqīnī ke saare avāriz kā shāfī hai

jhuuT kā saudā aksar mahñgā paḌtā hai
sach kahtā huuñ daam burā hai chhī chhī chhī

maiñ ne kahā jalvoñ kā maskan ujle chehre ūñchī zaat
sab ne kahā tum sach kahte ho bolā ek qalandar jhuuT

is zamāne se koī tavaqqo na rakh kis meñ himmat hai ḳhanjar pe rakh de zabāñ
adl-gāhoñ meñ insāf bikne lagā sach bhī kahnā hai jurm aadmī ke liye

ye daur bhī kyā daur hai is daur meñ yaaro
sach bolne vāloñ kā hī anjām burā hai