Tags-Sach

ḳhud vo karte haiñ jise ahd-e-vafā se ta.abīr
sach to ye hai ki vo dhokā bhī mujhe yaad nahīñ

chalo ye sach hī sahī hogā nā-gahāñ guzre
hamāre dar se magar aap mehrbāñ guzre

ik sach kī aabrū kī hifāzat ke vāste
ḳhud apne aap hī se mukarnā paḌā mujhe

sach hai is ek parde meñ chhupte haiñ laakh aib
ya.anī janāb-e-shaiḳh kī dāḌhī darāz hai

bayān-e-ġham kī latāfateñ haiñ mohabbatoñ kī nazākateñ haiñ
vagarna 'ehsās' sach to ye hai salīqa kyā mujh ko shā.irī kā

sach to ye hai ki mire paas hī dirham kam haiñ
varna is shahr meñ is darja girānī bhī nahīñ

sach kahā hai dil ko hai ik dil se raah
un ke lab par mere jī kī baat hai

ai mere ḳhudā kuchh tū hī batā ye daur-e-alam kab guzregā
is bastī meñ to musannif bhī sach kahne se ghabrāte haiñ

shahr meñ sach boltā phirtā huuñ maiñ
log ḳhā.if haiñ mire anjām se

har sitam lutf hai dil ḳhūgar-e-āzār kahāñ
sach kahā tum ne mujhe ġham se sarokār kahāñ

ik din ham ne zabāñ khol dī sach kahne ko
aur phir shāmat-e-a.amāl hamārī aa.ī

haañ nahīñ chāhiye us darja mohabbat terī
ki mirā sach bhī tire jhuuT kā hissa ho jaa.e

ye sach hai merī sadā ne raushan kiye haiñ mehrāb par sitāre
magar mirī be-qarār āñkhoñ ne aa.ine kā ziyāñ kiyā hai

maiñ sach to kah duuñ par us ko kahīñ burā na lage
mire ḳhayāl kī yārab use havā na lage

chāhe inkār ham kareñ sach kā
hove hai zehn par asar phir bhī

himmat kahāñ hai mujh meñ ki sach bol kar dikhā.ūñ
baiThe hue haiñ joḌe kamānoñ meñ tiir log

ik roz kah diyā thā haqīr inkisār meñ
ye baat sach samajh ga.e saare haqīr log

sach sach ye kah rahā hai tanāsuḳh kā mas.ala
rūh-e-azīz-e-yūsuf-e-kan.āñ tumhīñ to ho

sach batāo phir apne baare meñ
gar mujhe rāz-dāñ samajhte ho

maiñ tanhā laḌkī dayār-e-shab meñ jalā.ūñ sach ke diye kahāñ tak
siyāhkāroñ kī saltanat meñ maiñ kis tarah āftāb likkhūñ