Tags-Sach

maañ ne koī ḳhauf aisā rakh diyā dil meñ mire
sach kabhī maiñ bol hī paa.ī na puurā is taraf

sach kahā tū ne ki tere haiñ magar
lafz saare be-ma.ānī ho ga.e

ye baat agar sach hai ki tum pīr-e-muġhāñ ho
is riñd ko jī bhar ke pilā kyuuñ nahīñ dete

ab to sach bolne kī rasm nahīñ
kis ne phir ehtimām-e-dār kiyā

ḳhud raakh hue sub.h talak sach hai ye lekin
ai raat tire jism ko pighlā to ga.e ham

us kī jānib dekh kar āḳhir ye mujh ko kyā huā
ek sach hoñToñ pe mere aate aate rah gayā

āfrīñ dil kuuñ mire ḳhuub bajā kaam aayā
sach sipāhī ko baḌā nañg hai Tal jaane kā

mirā irāda to pahle hī se hai maan jaane kā sach batā.ūñ
tum apne bhar bhī tamām harboñ ko āzmāo mujhe manāo

kabhī to sach kabhī bilkul gumān lagte haiñ
nafīs log haiñ jādū-bayān lagte haiñ

sach kī sūrat kahī hai jis ne bhī
sach to ye hai vo baat merī hai

ab bhī is rāhguzar meñ hai jahāñ thī pahle
sach to ye hai na kahīñ aa.ī qayāmat na ga.ī

ḳhudā ke sāmne ai mohtasib sach bolnā hogā
mire sāġhar meñ mai dekhī hai yā ḳhūñ-nāb dekhā hai

ranjisheñ sab chhoḌ diiñ sab se laḌā.ī chhoḌ dī
aib thā sach bolnā maiñ ne burā.ī chhoḌ dī

talāsh ke bāvajūd sach hai ki mere hisse meñ kuchh na aayā
ki maiñ ne ḳhushiyāñ hazār DhūñDīñ ki dard maiñ ne hazār māñge

jo har nazar meñ taaza kareñ mai-kade hazār
sach hai 'surūr'-e-rafta ko vo yaad kyā kareñ

jo sach pūchho to ḳhud jiite haiñ aur jiinā sikhāte haiñ
vo dīvāne jo har tūfān-e-ġham meñ muskurāte haiñ

ḳhūb-rūī ke liye zishtī-e-ḳhū bhī hai zarūr
sach to ye hai ki koī tujh sā tarah-dār nahīñ

har kahīñ sach hī bolnā chāhe
shāyad 'akbar' nayā nayā hai yahāñ

sach kahā hai kisī ne ye ai 'zauq'
māl-e-mūzī nasīb-e-ġhāzī hai

duniyā samajh rahī hai kī us ne bhulā diyā
sach ye hai us ko ab bhī mirā intizār hai