Tags-Sach

ye bhī aa jaatī hai jab dekh lī sūrat terī
sach hai ulfat nahīñ muñh dekhe kī ulfat terī

rag-e-jāñ se bhī jo nazdīk aatā jā rahā hai
maiñ kyā sach-much use hamrāz karnā chāhtā huuñ

sach sahī jannat-o-dozaḳh kā fasāna lekin
kis tarah maan luuñ maiñ terī zabānī vaa.iz

masal sach hai bashar kī qadar ne.amat ba.ad hotī hai
sunā hai aaj tak ham ko bahut vo yaad karte haiñ

mujh ko yaqīñ hai sach kahtī thiiñ jo bhī ammī kahtī thiiñ
jab mere bachpan ke din the chāñd meñ pariyāñ rahtī thiiñ

un se kahā ki sidq-e-mohabbat magar daroġh
kahne lage ye sach hai ki har tarah par daroġh

ye baat sach hai ki buniyād huuñ imārat kī
ye aur baat kisī ko nazar na aa.uuñ maiñ

fuhsh baktā huuñ aaḌ meñ sach kī
thop doge ye tajziya mujh par

log badleñge mafāhīm musalsal 'āġhāz'
aur ye sach hai mire ash.ār nahīñ badleñge

bātil ke jalā.e hue dīpak kā hai charchā
jo sach kā hai sūraj vo tamāshā sā lage hai

apnī tārīf sunī hai to ye sach bhī sun le
tujh se achchhā tirā kirdār nahīñ ho saktā

zahr mīThā ho to piine meñ mazā aatā hai
baat sach kahiye magar yuuñ ki haqīqat na lage

ye sach hai ishq hī sābit-qadam nahīñ merā
maiñ kah rahā huuñ mirā e'tibār mat karnā

shikva-e-jaur to karte haiñ magar sach to ye hai
lutf ham par ho 'jigar' ham ne ye chāhā bhī nahīñ

maiñ kahtā thā suno sachchā.ī to ḳhud hai sila apnā
ye nukta iktisābī thā magar sach boltā thā maiñ

tū us kī āñkhoñ ko dekh kar hī samajh le 'javvād'
vo sach chhupā kar faqat kahānī banā rahā hai

tū sach batā ki tujhe itnī kyuuñ hai bechainī
magar payām kisī be-qarār kā pahuñchā

sach kah duuñ ai barhaman gar tū burā na maane
tere sanam-kadoñ ke but ho ga.e purāne

mujh ko bhī intizār thā abr aa.e to piyūñ
saaqī agar ye sach hai ki bādal uThā to lā

sach hai hiile mujhī ko aate haiñ
aur tumheñ kis qadar nahīñ aate