Tags-Sach

husn tumhārā to hai sach aur ḳhair sarāpā
ham se hī bas shar-añgezī ho jaatī hai

ġhazloñ meñ vaise to sach kahtā huuñ lekin
kuchh na kuchh to rañg-āmezī ho jaatī hai

ġhalat-fahmiyāñ 'mīt' rakkho na dil meñ
vahī sach nahīñ jitnā tum ne sunā hai

ek sach ye hai jo duniyā ko baratne pe khulā
ek sach vo jo kitāboñ meñ likhā dekhtā huuñ

sach agar pūchho to ham kāfir bhī haiñ momin bhī haiñ
but-kada meñ baiTh kar yād-e-ḳhudā karte rahe

ye ā.īna hai ye to sach hī kahegā
kyuuñ apnī haqīqat se katrā rahe ho

vo bhī sach kahte haiñ 'aḳhtar' log begāne hue
ham bhī sachche haiñ ki duniyā kā chalan aisā na thā

maiñ to samjhā thā faqat zehn kī taḳhlīq hai vo
vo to sach-much hī mire dil meñ samānā chāhe

jhuuT kī ār-pār lazzat ne
sach kī tāsīr hī bhulā dī hai

sach kahne kā āḳhir ye anjām huā
saarī bastī meñ maiñ hī badnām huā

yahāñ sach bolne par zahr kā pyāla hī miltā hai
ajab rasm-e-sitam dekhī hai tere shahr kī ham ne

jahāñ vaalo na maano tum magar sach hai ki duniyā meñ
baḌhāyā hai tah-e-ḳhanjar vaqār-e-āshiqī ham ne

ye sach hai ki tum aaoge par dil ko karūñ kyā
kahne kā yaqīñ aap ke aslā nahīñ hotā

muravvat se ho begāna vafā se duur ho kosoñ
ye sach hai nāznīñ ho ḳhūbsūrat ho magar kyā ho

ab to muñh se bol mujh ko dekh din bhar ho gayā
ai but-e-ḳhāmosh kyā sach-much kā patthar ho gayā

sach bhī maiñ nahīñ kahtā jhuuT se bhī bachtā huuñ
raah ik na.ī maiñ ne beach se nikālī hai

maiñ us ke jhuuT ko bhī sach samajh ke suntā huuñ
ki us ke jhuuT meñ bhī zindagī kī quvvat hai

paḌā hī marnā bas ab to ham ko jo us ne ḳhat paḌh ke nāma-bar se
kahā ki gar sach ye haal hotā to daftar itnā raqam na hotā

sach kā zahr gavāra na kisī ko bhī huā
talḳhī-e-zā.eqa-e-kām-o-zabāñ maiñ hī thā

vo bhī hamāre naam se begāne ho ga.e
ham ko bhī sach hai un se mohabbat nahīñ rahī