Tags-Sach

jo mujh se hañs ke kahā jis liye ham aa.e haiñ
'nazīr' tum ne bhī sach kahiyo kyā kiyā ma.alūm

imtihāñ hai ki sazā aur sazā hai jo ye umr
kitnī taqsīr hai yā sach koī taqsīr bhī hai

jin kī āġhosh-e-tasavvur meñ hai vo huur jamāl
kahīñ sach ho na yahī ḳhvāb-e-pareshāñ un kā

maiñ jhuuT ko sach se kyuuñ badlūñ aur raat ko din meñ kyuuñ gholūñ
kyā sunñe vaalā bahrā hai kyā dekhne vaalā andhā hai

maiñ us ke jhuuT ko bhī sach samajh ke suntā huuñ
ki us ke jhuuT meñ bhī zindagī kī quvvat hai

ye baat sach hai ki vo zindagī nahīñ merī
magar vo mere liye zindagī se kam bhī nahīñ

sīkhe ho kis se sach kaho pyāre ye chāl-Dhāl
tum yak taraf chalo ho to talvār yak taraf

ye sach hai ki peT apnā bhartī hai billī
kitchen kī safā.ī to kartī hai billī

shahr vo sāhūkār hai jis ko kos rahā hai har koī
ye sach bhī sab ko ma.alūm hai dāna-pānī us ke paas

apne matlab ke āshnā ho tum
sach hai tum ko kisī se kyā matlab

bad-gumāñ aisā huā huuñ maiñ fareboñ se tire
sach bhī jab sāmne aatā hai to Dar jaatā huuñ

kaho ḳhvāh kuchh bhī magar sach to ye hai
jo hote haiñ jhūTe vo khāte haiñ qasmeñ

hai sach to ye ki mohabbat kā haq adā na huā
sitam to tark-e-mohabbat kā ik bahāna huā

laakh pardoñ meñ rahūñ bhed mire kholtī hai
shā.irī sach boltī hai

sach to ye hai be-jagah rabt in dinoñ paidā kiyā
soch hai har dam yahī ham ko ki ham ne kyā kiyā

daraḳhtoñ ko harā rakhne ke zimmedār the donoñ
jo sach pūchho barābar ke haiñ mujrim bāġhbāñ aur ham

nahīñ detī ijāzat jhuuT kahne kī ye ḳhuddārī
agar sach bolte haiñ mahfiloñ meñ sar nahīñ rahtā

sach hai ki vo burā thā har ik se laḌā kiyā
lekin use zalīl kiyā ye burā kiyā

umr bhar sach hī kahā sach ke sivā kuchh na kahā
ajr kyā is kā milegā ye na sochā ham ne

jhūTā hai jhuuT baat ye bolegā ā.īna
aao hamāre sāmne ham sach batā.eñge