Tags-Sach

maiñ ne muddat se koī sach bhī nahīñ bolā hai
phir mujhe daar pe kyuuñ ahl-e-jahāñ khīñchte haiñ

rāsta pur-ḳhār dillī duur hai
sach kahā hai yaar dillī duur hai

sach hai in donoñ kā hai ik aalam
merī tanhā.ī terī yaktā.ī

ġhair se sun ke mirā haal ta.assuf se kahā
jo ye sach hai to burī chiiz mohabbat hai zarūr

kuchh bhī thā sach ke taraf-dār huā karte the
tum kabhī sāhab-e-kirdār huā karte the

ishq karte the faqat pās-e-vafā rakhne ko
log sach-much ke vafādār huā karte the

sad-haif sar-guzisht jo apnī kahī 'jalāl'
tū is ko dāstān samajh sach ko jhuuT kar

ye hashr ye hañgāma nahīñ aaj pe mauqūf
sach ye hai ki sadiyoñ hī se bīmār hai duniyā

sach ko maiñ ne sach kahā jab kah diyā to kah diyā
ab zamāne kī nazar meñ ye himāqat hai to hai

sach kā hai qaht yahāñ jhuuT kā bāzār hai garm
ab hameñ mauj-e-fanā saath liye phirtī hai

rahne do un ko ishq-o-junūñ ke sarāb meñ
talḳhī hai utnī sach meñ ki behtar fareb hai

ye kis tarah yaad aa rahī ho ye ḳhvāb kaisā dikhā rahī ho
ki jaise sach-much nigāh ke sāmne khaḌī muskurā rahī ho

ye sach hai vafādār koī nahīñ hai
kisī din mujhe āzmāyā to hotā

sach baat to ye hai ki kare bhī to koī kyā
aatā hai burā vaqt to kah kar nahīñ aatā

hasīn shaam jo guzrī vo yādgār banī
ye baat vaise bhī sach hai bharam kī baat nahīñ

sach ghaTe yā baḌhe to sach na rahe
jhuuT kī koī intihā hī nahīñ

sach hai ki mohabbat meñ hameñ maut ne maarā
kuchh is meñ tumhārī bhī ḳhatā hai ki nahīñ hai

phir san se kahīñ purvā.ī chalī khilte nahīñ dekhī dil kī kalī
ye jhuuT hai barkhā hotī hai ye sach hai ki bādal rotā hai

jinheñ ye fikr nahīñ sar rahe rahe na rahe
vo sach hī kahte haiñ jab bolne pe aate haiñ

talḳhiyāñ masrūfiyat ne kuchh baḌhā diiñ is qadar
sach kahūñ shīrīñ-dahan se mujh ko to nafrat nahīñ