Tags-Sach

āsāñ huā sach kahnā to bolegā muarriḳh
filhāl use jaan bachāne kī paḌī hai

tum ye kahte ho ki qaa.il nahīñ aslāf kā maiñ
sach hai ye daur bhī aslāf parastī kā nahīñ

āshiqī kyā hai sach jo pūchho to
ham ko marne kā ik bahāna milā

is haj meñ vo but bhī saath hogā
ye sach hai 'riyāz' to ga.e ham

agar sach kī haqīqat ab khulī hai
to jo ab tak nazar aayā thā kyā thā

sach ye kahte haiñ ki hañsne kī jagah duniyā nahīñ
chashm-e-ibrat haiñ chaman ke phuul murjhāne ke ba.ad

maiñ us se jhuuT bhī bolūñ to mujh se sach bole
mire mizāj ke sab mausamoñ kā sāthī ho

tumhārā vaqt nahīñ sach ke bolne vaalo
na chup rahoge to kaT jā.egī zabāñ dekho

kaun sī raah chalūñ kufr mohabbat sach kah
kaam aa.egā vahāñ maz.hab-e-islām ki tū

maiñ bhī sach kahtā huuñ is jurm meñ duniyā vaalo
mere hāthoñ meñ bhī ik zahr kā piyāla de do

ik sach kī āvāz meñ haiñ jiine ke hazār āhañg
lashkar kī kasrat pe na jaanā bai.at mat karnā

sach hai dil-e-dīvāna ḳhvāboñ se bahaltā hai
har raat magar kaise bahlā.iye ḳhvāboñ ko

kab kab tum ne sach nahīñ mānīñ jhūTī bāteñ ġhairoñ kī
tum ham ko yuuñ hī jalā.e ga.e ve tum ko vo haiñ lagā.e ga.e

sach to ye hai ki sach nahīñ kuchh bhī
sirf afsāne kā mazā lūñgā

sach hai uThā.e kab tak har ik kī be-adā.ī
aatī hai 'mus.hafī' ko ab aar zindagī se

agar maiñ sach kahūñ to sabr hī kī āzmā.ish hai
ye miTTī imtihāñ pyāre ye paanī āzmā.ish hai

us aañkh ne jis kī qismat meñ sach-much ke dar-o-dīvār na the
ḳhvāboñ ke nagar ābād kiye hasrat kī nazar karne ke liye

sach pe sau sau parde Daale
sapnā ik bīmār ḳharīdā

sach kahte haiñ shaiḳh 'akbar' hai tā.at-e-haq lāzim
haañ tark-e-mai-o-shāhid ye un kī buzurgī hai

tū mile 'mehr' se iimā yahī tārīḳh ho sach
gulshan-o-bāda-o-gul meñ tujhe garmā.e havā