Tags-Sach

maiñ ne halkān kiyā jis kī talab meñ ḳhud ko
sach to ye hai ki vo duniyā bhī nahīñ chāhiye hai

parda-e-hijr vahī hasti-e-mauhūm thī 'yās'
sach hai pahle nahīñ mālūm thā ye raaz mujhe

in hasīnoñ kī jo tārīf karo chiḌhte haiñ
sach to ye hai ki burā hai unheñ achchhā kahnā

kar liyā ahd kabhī kuchh na kaheñge muñh se
ab agar sach bhī kaheñ tum hameñ jhūTā kahnā

jo kahte haiñ kahte raheñ ahl-e-duniyā
magar ham to 'nāqid' sadā sach kaheñge

vo chand lafz jo kuchh bhī nahīñ sivā sach ke
vo chand lafz bayāñ meñ kahīñ nahīñ aa.e

bazm meñ sach bhī maiñ ne bolā hai
zahr kā jaam bhī piyūñgā maiñ

sach kaho kis se hai ye nain khilāne kā shauq
bhejte ho jo pa.e-surma-safāhāñ mujh ko

dil us ko aap diyā aap hī pashemāñ huuñ
ki sach hai apnī nadāmat kahūñ to kis se kahūñ

har ik ye kahtā hai ab kār-e-dīñ to kuchh bhī nahīñ
ye sach bhī hai ki mazā be-yaqīñ to kuchh bhī nahīñ

loriyāñ subkiyāñ meñ badlī haiñ
koī sach-much meñ so gayā ya.anī

sach chhupātī rahī havā ya.anī
dasht kā haal aur thā ya.anī

log kahte haiñ to logoñ pe ta.ajjub kaisā
sach to kahte haiñ ki nādāroñ kī izzat kaisī

hameñ tanhā.iyoñ meñ yuuñ to kyā kyā yaad aatā hai
magar sach pūchhiye to ek chehrā yaad aatā hai

gar dekhiye to ḳhātir-e-nāshād shaad hai
sach pūchhiye to hai dil-e-nākām kaam kā

us sañg-dil ke hijr meñ chashmoñ ko apne aah
mānind-e-ābshār kiyā ham ne kyā kiyā

sach hai yā phir muġhālta hai mujhe
koī āvāz de rahā hai mujhe

vo zulf-e-pur-pech-o-ḳham hai us kī phañsā to niklegā phir na hargiz
hamārā kahnā hai sach are jī tū kaam us se na Daal dil kā

sunā hai teġh ko qātil ne āb-dār kiyā
agar ye sach hai to be-shubah ham pe vaar kiyā

sach ye hai ki ik umr guzārī sar-e-maqtal
ham kaun se lamhe meñ sar-e-dār nahīñ the