Tags-Sach

zabāñ se baat niklī aur parā.ī ho ga.ī sach hai
abas ash.ār ko karte haiñ ham tash.hīr pahle se

aaj maqtal meñ ḳhabar hai ki charāġhāñ hogā
gar ye sach hai to mire qatl kā sāmāñ hogā

kuchh to sach bol ki dil se ye girāñ bojh haTe
zindagī jhuuT kā tūmār huī jaatī hai

'ravāñ' sach hai mohabbat kā asar zaa.e.a nahīñ hotā
vo ro dete haiñ ab bhī zikr aatā hai jahāñ merā

vāqi.a kuchh bhī ho sach kahne meñ rusvā.ī hai
kyuuñ na ḳhāmosh rahūñ ahl-e-nazar kahlā.ūñ

sher to kahte the ham sach hai ye 'alvī' magar
tum ko sunāte kabhī itnī bhī fursat na thī

sach kahūñ 'āmir' ki ab us daur meñ jiite ho tum
rasm-e-ulfat bhī jahāñ suud o ziyāñ hone lagī

hameñ pata hai tumheñ jo ye sab sikhā rahā hai
agar suno sach to pesh jhūTī dalīl karnā

'farāġh' aise bhī insān maiñ ne dekhe haiñ
jo sach kī raah meñ paa.e ga.e haiñ marte hue

lahje meñ sach kā zuhūr ugalne kā jurm thā
merī ġhazal ko dhuup meñ jhulsā diyā gayā

ā.ankhoñ ko merī sach se bachāne kī fikr meñ
T v ke scrēn pe chipkā diyā gayā

tum bhī kahlāte ho dāman-kash-e-duniyā 'bāqar'
sach to ye hai tumheñ jiine kā salīqa bhī nahīñ

kin ne chaman meñ mai-kashī kī hai sabā tū sach kaho
jaam hai gul ke haath meñ ġhuncha subū ba-dosh hai

jhuuT vaale kahīñ se kahīñ baḌh ga.e
aur maiñ thā ki sach boltā rah gayā

jab se lagī hai aañkh mirī husn-e-yār se
sach pūchhiye to aañkh abhī tak lagī nahīñ

ek ho jis kā zāhir-o-bātin
sach to ye hai vo sab se behtar hai

be-lausī se aa.e ho sach-much
yā koī maqsad hai dil meñ

apne andar hañstā huuñ maiñ aur bahut sharmātā huuñ
ḳhuun bhī thūkā sach-much thūkā aur ye sab chālākī thī

hazār kī tū ne harza-goī magar kahā mudda.ā na dil kā
jo sach kaheñ to zamāne meñ 'kaif' tujh sā bhī be-zabāñ na dekhā

hameñ baḌoñ ne yahī kahā thā ki lā hī sach hai so ghar kī chhat par
kisī jamā.at kisī ḳhudā kā alam nahīñ hai to kyā ġhalat hai