Tags-Sach

rāsta sach kā hai kaThin pyāre
har qadam imtihān hotā hai

vāqi.a kuchh bhī ho sach kahne meñ rusvā.ī hai
kyuuñ na ḳhāmosh rahūñ ahl-e-nazar kahlā.ūñ

tum aap hī aa.e yuuñ hī sach hai
naale ko na be-asar kahūñgā

aap jab chehra badal kar aa ga.e
sach to ye hai ham bhī dhoka khā ga.e

ye bhī sach hai ki sambhalnā hai zarūrī merā
ye bhī sach hai ki sambhalnā hī nahīñ chāhtā maiñ

tire baġhair maiñ mar jā.ūñgā yahī sach hai
nahīñ hai hausla ab jhuuT ko bachāne kā

ik sach kī āvāz meñ haiñ jiine ke hazār āhañg
lashkar kī kasrat pe na jaanā bai.at mat karnā

ye puurā sach hai tum maano na maano
ki achchhe din tumhāre jā chuke haiñ

yaqīñ āsār lamhoñ par jo sach pūchho to raaz ab tak
hukūmat vahm hī kī hai tasallut ḳhvāb hī kā hai

kahā ye us ne ki ham agar sach kā saath deñ to
kahā ye maiñ ne ki sahne kī taab rakhnā

maiñ apne sach ko chhupā.ūñ to ruuh shor machā.e
azaab ho gayā merā samā.ateñ rakhnā

sharaf us ne diye hameñ saikḌoñ dam rahe tīnat saaf se paak hī ham
kahī baat agar to sach hī kahī kabhī jhuuT na bole ḳhudā kī qasam

jo kahūñgā vo sach kahūñgā 'ḳhalīl'
kyūñki rishta hai merā miTTī se

ye sach hai vo har hafte hī aatā hai
sab kī qismat meñ itvār nahīñ hotā

jhuuT kahūñ to dil tayyār nahīñ hotā
sach se lekin beḌā paar nahīñ hotā

jhuuT sach donoñ hī ā.īne haiñ
us taraf koī na ho dekho mat

sach hai ye hirs kartī hai insān ko ḳharāb
ġham khāyā is qadar ki maiñ bīmār ho gayā

ye sach hai jur.at-e-rindāna se qismat badaltī hai
magar har shaḳhs meñ jur.at bahut mushkil se aatī hai

sach yahī hai ki bahut aaj ghin aatī hai mujhe
vaise vo shai kabhī matlūb rahī bhī hai mujhe

ai ishq sach to ye hai ki shīrīñ ne kuchh na kī
hasrat kā koh dil pe liye kohkan gayā