Tags-Sad

udāsī aaj bhī vaisī hai jaise pahle thī
makīñ badalte rahe haiñ makāñ nahīñ badlā

sāhiloñ par udāsī rahī
ik nadī phir se pyāsī rahī

duur udāsī karnī ho to shauq se tum
kamre meñ merī tasvīr lagā sakte ho

lagā kar zaḳhm par pahre sulā ke dil ke saare ġham
maiñ jab bhī hañsnā chāhūñ to udāsī chīḳh paḌtī hai

dekh pā.eñge un āñkhoñ meñ udāsī kaise
apne dukhḌe na 'ziyā' un ko sunāne jaa.eñ

maiñ jab bhī us kī udāsī se uub jā.ūñgī
to yuuñ hañsegā ki mujh ko udaas kar degā

sabab maiñ DhūñD rahī thī mirī udāsī kā
tirā ḳhayāl mujhe aaj baar baar aayā

tumheñ jo sochā to mere dil se udāsiyoñ kā hujūm guzrā
kabhī kabhī to huā hai yuuñ bhī ki be-sabab chhā ga.ī udāsī

milī thī jis din lagā thā yuuñ ke nahīñ banegī kabhī hamārī
jo saath ham ne bitā.e kuchh din to ek din bhā ga.ī udāsī

kabhī kisī ne jo dil dukhāyā to dil ko samjhā ga.ī udāsī
mohabbatoñ ke usuul saare hameñ bhī sikhlā ga.ī udāsī

na jaane kin pahluoñ meñ rah kar huī hai gahrī mirī udāsī
na jaane kin kin laboñ se pī kar ye zindagī pā ga.ī udāsī

vo daur bhī thā ki fāsloñ se guzar rahī thī nadī kī sūrat
na jaane kis kī duā hai yāroñ ki mujh meñ bhī aa ga.ī udāsī

zarā sī duurī pe baiTh kar vo nigāh mujh se milā rahī thī
jo apnī bāñhoñ meñ bhar liyā to adā se sharmā ga.ī udāsī

paḌī huī thī niDhāl ho kar hamārī āñkhoñ ke āñganoñ meñ
kisī kī aahaT sunī to chauñkī zarā sī ghabrā ga.ī udāsī

koī ḳhud-kushī kī taraf chal diyā
udāsī kī mehnat Thikāne lagī

ghar se chalā to ghar kī udāsī sisak uThī
maiñ ne use bhī rakh liyā raḳht-e-safar ke biich

mere miTne kā kareñ sog kisī ke dushman
kyuuñ udāsī sī kisī jalva-gah-e-nāz meñ hai

masarratoñ kī ruteñ to tumhāre saath ga.iiñ
maiñ kaise duur karūñ ruuh kī udāsī ko

maiñ kisī shaḳhs kī udāsī thī
sard lahje meñ boltī thī maiñ

mirī udāsī mire darmiyān band karo
koī salīqe se ye itr-dān band karo