Tags-Sad

qurbat ke us peḌ kī shāḳhoñ par dekho
phuul udāsī kā hai samar afsos kā hai

ye udāsī kā sabab pūchhne vaale 'ajmal'
kyā kareñge jo udāsī kā sabab batlāyā

kuchh to mirī udāsī hañgāma bhī kiyā kar
tū aaj saath mere bāzār chal rahī hai

har ik jism ghāyal har ik ruuh pyāsī
nigāhoñ meñ uljhan diloñ meñ udāsī

jise na merī udāsī kā kuchh ḳhayāl aayā
maiñ us ke husn pe ik roz ḳhaak Daal aayā

to phir qaabū kiyā hai hijr kis jaadū se tum ne
udāsī gar nahīñ afsurda-gāñ kyā chal rahā hai

phir ye sochoñ meñ haiñ māyūsī kī lahreñ kaisī
phir ye har dil meñ udāsī kā guzar kaisā hai

sar-e-tūfān-e-ġham aksar sahārā DhūñD lete haiñ
udāsī ke samundar meñ kināra DhūñD lete haiñ

merī bastī meñ udāsī kaisī
shahar kī samt chalā hai kyā hai

mai-kade kī ye udāsī nahīñ dekhī jaatī
nahīñ ma.alūm hai kyā der bahār aane meñ

ġham bhī hai udāsī bhī tanhā.ī bhī aañsū bhī
sab kuchh to mayassar hai dil māñge to kyā māñge

mire ghar se ziyāda duur sahrā bhī nahīñ lekin
udāsī naam hī letī nahīñ bāhar nikalne kā

piv binā dil mirā udāsī hai
gaah jogī hai gaah sanyāsī hai

use udāsī meñ yaad karnā ki yaad kar ke udaas honā
ye pūchh ham se hai kitnā mushkil bikharnā aur ḳhud ko joḌnā phir

mere hisse kī udāsī mujhe lauTā denā
jā rahe ho to mujhe koī to tohfa denā

is na.e saal ke svāgat ke liye pahle se
ham ne poshāk udāsī kī silā ke rakh lī

har ḳhushī maqbaroñ pe likh dī hai
aur udāsī gharoñ pe likh dī hai

is qadar gahrī udāsī kā sabab khultā nahīñ
jaise hoñToñ se koī harf-e-duā tak le gayā

kuchh tabī.at āj-kal paatā huuñ ghabrā.ī huī
shahr bhar meñ hai udāsī har taraf chhā.ī huī

har udāsī kā qatl hotā hai
jab mirā dost muskurātā hai