Tags-Sad

ajiib haal hai 'ja.afar' badalte mausam kā
kisī ko kar ga.ī shādāñ sazā udāsī kī

falak ke chāñd sitāroñ meñ raushnī kam hai
mujhe to lagtī hai is meñ ḳhatā udāsī kī

masarratoñ se kahīñ dil-rubā sitam niklā
lapeTe shaal bahut ḳhushnumā udāsī kī

hayāt pā na sakegī husain sī ḳhvāhish
samā.atoñ meñ hai jab tak sadā udāsī kī

ġhamoñ kī rut se kabhī dil figār mat honā
ḳhushī luTā ga.ī aksar adā udāsī kī

jabīñ pe shahr kī likh kar fazā udāsī kī
bahut hai ḳhush koī de kar duā udāsī kī

na ho sakā mujhe ma.alūm kar ga.ī kaise
mire vajūd ko larzāñ havā udāsī kī

udāsī kā aalam yahāñ tak rahā hai
maiñ hote hue sab akelā rahā huuñ

udāsī kā qasīda is baras bhī
sar-e-dīvār-e-jāñ likkhā gayā hai

dil hai afsurda to bahār kahāñ
baaġh meñ har taraf udāsī hai

pūchhte kyā ho in āñkhoñ kī udāsī kā sabab
ḳhvāb jo dekhe vo ḳhvāboñ kī haqīqat māñge

maiñ jañgaloñ kī taraf chal paḌā huuñ chhoḌ ke ghar
ye kyā ki ghar kī udāsī bhī saath ho ga.ī hai

purānī qabreñ adhūre chehre ugal rahī thiiñ
adhūre chehre purānī qabroñ kī sard-zā bhurbhurī udāsī jo apne uupar girā rahe the

mire vajūd ke andar hai ik qadīm makān
jahāñ se maiñ ye udāsī udhār letī huuñ

tujh se jab mil kar bhī udāsī kam nahīñ hotī
tere baġhair guzārā kaise ho saktā hai

udāsī ḳhuun meñ ghul jā.egī phir
use tū chaa.e kī pyālī meñ mat rakh

udāsī kī mahak aatī hai mujh se
mirī tanhā.ī hai itnī purānī

hijr kī shab guzar hī jā.egī
ye udāsī to umr bhar kī hai

lahje kī udāsī kam hogī bātoñ meñ khanak aa jā.egī
do-roz hamāre saath raho chehre pe chamak aa jā.egī

udāsī bichhī hai baḌī duur tak
bahāroñ kī beTī parā.ī huī