Tags-Sad

tilism toḌ diyā ik sharīr bachche ne
mirā vajūd udāsī kā isti.ārā thā

udāsī ke jazīre par ġhamoñ ke saa.e gahre haiñ
nigāhoñ ke samundar meñ lahū-rañg ashk Thahre haiñ

parde meñ ḳhamoshī ke burqe meñ udāsī ke
shāyad koī aa jaa.e darvāza khulā rakhnā

vo udāsī ki bikharne se nahīñ bach saktā
aur tirā lams ki chuntā chalā jaatā hai mujhe

udāsī habs dhuāñ ishq bekalī sahrā
sabhī ne mujh se faqat apnā apnā kaam liyā

aa ga.ī raas mire dil kī udāsī shāyad
itnī muddat bhī kahīñ daur-e-ḳhizāñ rahtā hai

lamhoñ ko udāsī meñ samonā nahīñ achchhā
taqdīr bigaḌ jaa.e to ronā nahīñ achchhā

shab-e-mātam kī udāsī hai suhānī kitnī
chhāñv meñ tāroñ kī nikle haiñ sañvarne vaale

din mirā phir bhī kisī taur guzar jā.egā
raat aa.egī udāsī ko kushāda karne

aaj bhī hai tirī duurī hī udāsī kā sabab
ye alag baat ki pahlī sī nahīñ kuchh kam hai

zard udāsī chhā.ī hai
khetoñ se khaliyānoñ tak

us vaqt kī udāsī hai dekhne ke qābil
jab koī ro rahā ho afsurda chāñdnī meñ

yuuñ mire ba.ad hai duniyā pe udāsī taarī
jaise duniyā mire hālāt kā ġham khātī hai

eid ḳhushiyoñ kā din sahī lekin
ik udāsī bhī saath laatī hai

ye mere ghar kī udāsī hai aur kuchh bhī nahīñ
diyā jalā.e jo dar par mirī talāsh meñ hai

sab merī udāsī meñ tujhe DhūñD rahe the
hañsnā bhī mirā tujh ko chhupāne ke liye thā

yuuñ to kuchh shaam se pahle bhī udāsī thī 'adīb'
ab to kuchh aur baḌhī dil kī lagī shaam ke ba.ad

chamak rahī hai udāsī mire havāle se
maiñ 'ramz' ab bhī kisī chashm-e-tar meñ raushan huuñ

qarnoñ kī ḳhamoshī ko hasrat hai sail-e-bayāñ ban jaane kā
sadiyoñ kī udāsī ko zid hai ik nutq-e-javāñ ban jaane kā

ghuTan taḌpan udāsī ashk rusvā.ī akelā-pan
baġhair in ke adhūrī ishq kī har ik kahānī hai