Tags-Sadgi

sādgī-hā-e-tamannā ya.anī
phir vo nairañg-e-nazar yaad aayā

vaañ shoḳhiyoñ ne maare nākām kaise kaise
yaañ sādgī se kyā kyā umīd-vār haiñ ham

hai javānī ḳhud javānī kā siñgār
sādgī gahna hai is sin ke liye

ḳhushā vo log ki mahrūm-e-iltifāt rahe
tire karam ko ba-andāz-e-sādgī na liyā

mizāj-e-husn-o-mohabbat meñ sādgī na fareb
na vo yaqīn rahā ab na vo daġhā.eñ rahīñ

tirī rañgīniyoñ meñ sādgī kī shaan hotī hai
tire afkār kī duniyā bhī sheristān hotī thī

ajab ḳhulūs ajab sādgī se kartā hai
daraḳht nekī baḌī ḳhāmoshī se kartā hai

bholā-pan aur sādgī par us kī maiñ miTtā huā
ek sūrat mohnī sī dil meñ ghar kartī huī

is sādgī pe kaun na mar jaa.e ai ḳhudā
laḌte haiñ aur haath meñ talvār bhī nahīñ

jaltā-bujhtā ye kirmak-e-shab-tāb
us ko pur-kār-e-sādgī kahiye

maiñ sāda-lauh sāda-bayāñ sāda-ārzū
aur us ne sādgī pe bharosa nahīñ kiyā

ye zīnateñ bhī ajab haiñ ye sādgī bhī ajab
riyā ke saare hunar jism par sajā rakhnā

vo jalāl-e-sheva-e-sādgī vo jamāl-e-sūrat-e-zindagī
vo zulāl-e-chashma-e-āgahī ki zamāna-bhar ko jagā diyā

tire ishq kī intihā chāhtā huuñ
mirī sādgī dekh kyā chāhtā huuñ

tirī adāoñ kī sādgī meñ kisī ko mahsūs bhī na hogā
abhī qayāmat kā ik karishma hayā ke dāman meñ pal rahā hai

hājat nahīñ banāo kī ai nāznīñ tujhe
zevar hai sādgī tire ruḳhsār ke liye

dekhnī thī dekh lī is chheḌ kī bhī sādgī
be-diloñ meñ ye tabassum-hā-e-pinhāñ kuchh nahīñ

ik rañg-e-iltifāt bhī us be-ruḳhī meñ thā
ik sādgī bhī us nigah-e-sahar fan meñ thī

mire dil kī āb-o-havā lagī ki vafā bhī un ko ḳhatā lagī
vahī sādgī se jo aa.e the vahī bāñkpan se chale ga.e

qamīzoñ se baazū alag ho chuke haiñ
ġharāra bhī patlūn hai sādgī meñ