Tags-Safar

shab-e-safar kā ġham hī kyā shab-e-safar hai muḳhtasar
abhī to ek dal sā rāhbar hamāre saath hai

yahī nahīñ ki bas ġham-e-safar hamāre saath hai
mizāj-e-shabnam o dil-e-sharar hamāre saath hai

nazar meñ naqsh hai sub.h-e-safar kī vīrānī
bas ek maiñ thā aur ik sub.h kā sitārā thā

sab rāstoñ kā ilm thā manzil qarīb thī
afsos ham-safar kā irāda na kar sake

safar meñ ek hujūm thā magar ye raaz ab khulā
ki koī bhī yahāñ kisī ke saath chal nahīñ rahā

use bhī pyaar ke mausam pasand haiñ 'jāzib'
safar kī dhuup meñ jalne shajar bhī aatā hai

na jism-o-jāñ kā añdherā na rāstoñ kā ġhubār
jo tū mile to ik aisā safar bhī aatā hai

har ik maqām se aage maqām hai terā
hayāt zauq-e-safar ke sivā kuchh aur nahīñ

ġham-gusār-e-safar-e-rāh-e-vafā
mizha-e-ābla-pā hotī hai

ham-safar ham ne jahāñ naqsh-e-tamannā paayā
ham rah-e-zīst ke is moḌ pe bekār mile

ka.ī silsiloñ se juḌā huā ye jo zindagī kā safar rahā
na.ī manziloñ kī talāsh meñ ye rahīn-e-rāh-guzar rahā

hamesha ḳhair se pahuñchā huuñ apnī manzil par
safar se pahle maiñ kuchh de dilā ke chaltā huuñ

tishnagī had se sivā aur safar jaarī hai
par sarāboñ se bahal jaa.eñ zarūrī to nahīñ

ḳhalā ḳhalā bāzuoñ ko bhartī na.ī havā.eñ
safar sadaf bādbāñ samundar na.e na.e se

āġhāz-e-safar meñ qāfila thā
ab ek bhī ham-safar nahīñ hai

safar hai dushvār ḳhvāb kab tak bahut paḌī manzil-e-adam hai
'nasīm' jaago kamar ko bāñdho uThāo bistar ki raat kam hai

umr-safar jaarī hai bas ye khel dekhne ko
ruuh badan kā bojh kahāñ tak kab tak Dhotī hai

jis ko chalnā hai chale raḳht-e-safar bāñdhe hue
ham jahāñ-gasht haiñ uTThe haiñ kamar bāñdhe hue

us ik ummīd ko to rāhat-e-safar na samajh
hai rāste meñ kahīñ sāya-e-shajar na samajh

koī charāġh na jugnū safar meñ rakkhā gayā
dil-o-dimāġh ko jab apne ghar meñ rakkhā gayā