Tags-Safar

kho gayā jo bhī zād-e-safar paas thā
ḳhvāb oḌhe hue ik yaqīñ rah gayā

dil ko hai āfiyat-e-anjuman-e-gul kī talab
zindagī dasht-e-muġhīlāñ kā safar māñge hai

sadiyoñ se safar meñ hai samundar
sāhil pe thakan Tapak rahā hai

unheñ DhūñDho safar kī shaam se pahle
kisī anjām se pahle

kaun thā aisā ham-safar kaun bichhaḌ gayā 'zafar'
mauj-e-nashāt-e-rahguzar vaqf-e-malāl ho ga.ī

koī chāhe yā na chāhe ye safar hai nā-guzīr
kārvān-e-vaqt kī raftār kī bāteñ karo

ai dil kunj-e-mazār dekhā
pahlā ye maqām hai safar kā

ārām kahāñ nasīb ham ko
khaTkā darpesh hai safar kā

ab ke vo aise safar par kyā ga.e
phir dobāra lauT kar aa.e nahīñ

shamīm-e-gulshan nasīm-e-sahrā shuā-e-ḳhurshīd mauj-e-dariyā
har ek garm-e-safar hai in meñ merā koī ham-safar nahīñ hai

mujhe kisī bhī safar pe na jaane degā kabhī
use ḳhabar hai ki chalnā paḌegā us ko bhī

muḳhtasar sā hai hamārā qissa-e-shauq-e-safar
abr-e-āvāra the ham lekin sar-e-kohsār the

dil-e-ḳhush-fahm ko sub.h safar kī raushnī meñ
shab-e-ġham ke liye tayyār karnā chāhiye thā

kam hai ye zād-e-rāh ai 'parvīñ'
tum ko andāza-e-safar hī nahīñ

rah-e-safar meñ hai duur ek zau ḳhudā jaane
ye shahr se ki bayābāñ se tak rahī hai mujhe

jinheñ raas aa ga.e haiñ ye sahar-numā añdhere
ye talāsh-e-sub.h-e-nau meñ kabhī ham-safar the mere

kyā kyā supurd-e-ḳhāk hue nāmvar tamām
ik roz sab ko karnā hai apnā safar tamām

ek aañsū kī tarah tum mujhe ruḳhsat karnā
rok lo palkoñ pe āġhāz-e-safar hone tak

ik masāfat paañv shal kartī huī sī ḳhvāb meñ
ik safar gahrā musalsal zardī-e-mahtāb meñ

andhe safar ko ghar se maiñ niklā thā dosto
aa.ī jab un kī yaad añdhere chale ga.e