Tags-Safar

guzre jidhar se nuur bikhere chale ga.e
vo ham-safar hue to añdhere chale ga.e

raste meñ mil gayā to sharīk-e-safar na jaan
jo chhāñv mehrbāñ ho use apnā ghar na jaan

jhapak rahī haiñ zamān o makāñ kī bhī āñkheñ
magar hai qāfila āmāda-e-safar phir bhī

safar kī dhuup ne chehra ujaal rakkhā thā
vo mar gayā to sirhāne visāl rakkhā thā

nahīñ milūñgī kisī bhī vasl-āshnā safar meñ
maiñ hijr-mausam kī shiddatoñ meñ tumheñ milūñgī

safar nasīb agar ho to ye badan kyuuñ hai
dayār-e-ġhair tumhāre liye vatan kyuuñ hai

safar meñ saath ho guzrā zamāna
thakan kā phir patā chaltā nahīñ hai

ham bagūloñ kī tarah ḳhāk-basar phirte haiñ
paañv shal hoñ to ye āshob-e-safar bhī jaa.e

ai kaash ye sadā bhī kabhī kaan meñ paḌe
uTTho ki lauT aa.e haiñ apne safar se ham

āzād be-niyāz the apnī ḳhabar se ham
palTe kuchh is tarah se deccan ke safar se ham

ka.aba ke safar meñ kyā hai zāhid
ban jaa.e to aap se safar kar

dūriyāñ fāsle dushvār guzargāheñ haiñ
hai yahī shart-e-safar raḳht-e-safar apnā kyā

dil-e-kam-alam pe vo kaifiyat ki Thahar sake na guzar sake
na hazar hī rāhat-e-rūh thā na safar meñ rāmish raah thī

kyā kaheñ mahv-e-safar haiñ kab se
jism kā bojh uThā.e apne

kahā: ham apnī marzī se safar bhī kar nahīñ sakte
vo bole har qadam par ik na.ī dīvār to hogī

ajab tazād meñ kaaTā hai zindagī kā safar
laboñ pe pyaas thī bādal the sar pe chhā.e hue

safar to ḳhatm dard kā kisī paḌāv meñ nahīñ
jo naqsh khul chuke haiñ sab kisī subhāv meñ nahīñ

paanī ke bulbuloñ kā safar jānte hue
tohfe meñ dil na denā thā ham ne magar diyā

safar ye karte haiñ ik dil se dūsre dil tak
dukhoñ ke paañv meñ zanjīr thoḌī hotī hai

pyaas ko dariyā rahā aur ḳhaak ko sahrā rahā
is ke ma.anī ye hue ke ye safar achchhā rahā