Tags-Safar

mujhe kaise dasht meñ laa.e tum ki sadī sadī ke safar pe bhī
vahī rañg-o-nasl kī vahshateñ vahī mā-o-man kī udāsiyāñ

safar meñ tum hamāre saath rahnā
kahīñ ham rāstoñ meñ kho na jaa.eñ

safar-e-nasīb hai 'rāhī' misāl-e-bād-e-ravāñ
jahāt-e-shash kī zamām o rikāb de jaao

bichhaḌ ga.e haiñ kahāñ ham-safar ḳhudā jaane
nuqūsh-e-pā bhī nahīñ gard-e-kārvāñ bhī nahīñ

phir vahī fikr-e-safar fikr-e-talab fikr-e-zavāl
phir vahī tez masā.il vahī ḳhuñḳhār savāl

ham josh-e-javānī meñ aa kar ik lā-mahdūd safar meñ the
ma.alūm huā manzil ye na thī jab ghaaT kināre aa pahuñche

nazar meñ sūrat-e-sāhil abhī nahīñ aa.ī
mire safar kā har ik marhala samundar hai

ajiib shor parindoñ kī us uḌaan meñ thā
safar ke baad safar kā maza takān meñ thā

imkāñ chahār sū thā safar kā magar 'qamar'
tanhā khaḌā huā thā koī ham-safar na thā

mile jo us se to yādoñ ke par nikal aa.e
is ik maqām pe kitne safar nikal aa.e

jashn-e-zafar ek aur safar kī saa.at kā dībācha hai
ḳhema-e-shab meñ raqs bhī ho aur kuuch kī bhī tayyārī ho

safar jaarī hai jis ke dam pe 'kānhā'
agar nārāz vo jugnū huā to

chhalnī haiñ paañv kāñToñ-bharī rahguzar mile
ham ko hamārī shaan ke shāyāñ safar mile

vo lauT aa.e the ranj-e-safar ke imkāñ se
rafīq-e-rāh kī āvāz-e-pā ke hote hue

ek muddat se haiñ safar meñ ham
ghar meñ rah kar bhī jaise beghar se

ka.ī paḌāv the manzil kī raah meñ 'tābish'
mire nasīb meñ lekin safar kuchh aur se the

ye silsila-e-shām-o-sahar yūñhī nahīñ hai
har qāfila sargarm-e-safar yūñhī nahīñ hai

manzil bhī koī ḳhaas milegī hameñ 'rūhī'
dushvār se dushvār safar yūñhī nahīñ hai

tārīḳh sunā saktī hai sadiyoñ ke safar kī
ye gard sar-e-rāhguzar yūñhī nahīñ hai

safar meñ ishq ke ik aisā marhala aayā
vo DhūñDtā thā mujhe aur kho gayā thā maiñ