Tags-Safar

mujhe ye kyā paḌī hai kaun merā ham-safar hogā
havā ke saath gaatā huuñ nadī ke saath chaltā huuñ

kaif-e-safar ab apnā hāsil
kaisā jaada kaisī manzil

ġhazab ḳhudā kā kaḌī dhuup kā tavīl safar
aur us safar kā asāsa bas ik ridā-e-suḳhan

jo safar kā vaqt aayā na pukāre saath vaale
abhī aañkh lag ga.ī thī hameñ hoshiyār karte

jab tai huā safar to lahū pairahan huā
manzil ko dekhte hī ubalne lage haiñ ham

safar meñ hai jo azal se ye vo balā hī na ho
kivāḌ khol ke dekho kahīñ havā hī na ho

thā pahlā safar us kī rifāqat bhī na.ī thī
raste bhī kaThin aur masāfat bhī na.ī thī

tū ham-safar nahīñ hai to kyā sair-e-gulistāñ
to ham-subū nahīñ hai to phir kyā sharāb pī

marhale saḳht bahut pesh-e-nazar bhī aa.e
ham magar tai ye safar shaan se kar bhī aa.e

is safar meñ ka.ī aise bhī mile log hameñ
jo bulandī pe ga.e aur utar bhī aa.e

dil ke har mausam ne baḳhshī daulat-e-ehsās-o-dard
sirf is sarmā.e ko zād-e-safar rahne diyā

zindagī kā safar bhī jaarī hai
shaam hote hī ghar bhī jaatā huuñ

rañj hai hālat-e-safar hāl-e-qayām rañj hai
sub.h-ba-sub.h rañj hai shām-ba-shām rañj hai

ḳhaak se taḳhlīq hogī ātish-o-āb-o-havā
zindagī ḳhud apnā sāmān-e-safar bhī lā.egī

tire qurb ne jo baḌhā diye kabhī miT sake na vo fāsle
vahī paañv haiñ vahī aable vahī apnā zauq-e-safar bhī hai

na ho muzmahil mire ham-safar tujhe shāyad us kī nahīñ ḳhabar
inheñ zulmatoñ hī ke dosh par abhī kārvān-e-sahar bhī hai

haram kī raah meñ saaqī kā ghar bhī aatā hai
safar meñ lamha-e-tark-e-safar bhī aatā hai

be-masāfat ik safar dar-pesh rahnā chāhiye
sochte haiñ umr bhar kī jāda-paimā.ī ke baad

ḳhudā na hotā to kārvān-e-jahāñ meñ apnī jagah na bantī
ki in dinoñ meñ hamārā pesha safar meñ nazreñ utārnā thā

tū hai hamrāh to kāñTe bhī maza dene lage
yuuñ to kahne ko ka.ī baar safar ham ne kiyā