Tags-Safar

abhī gard-e-safar ke girye kī hai guuñj kānoñ meñ
abhī kyuuñ muntazir ḳhālī sarā.eñ shor kartī haiñ

is se aage kaun jaa.e dasht-e-nā-mālūm meñ
ham na kahte the ki saare ham-safar manzil ke haiñ

ye kah ke ho ga.e ḳhud se bhī ham judā 'hurmat'
safar meñ kaun kisī ajnabī ke saath chale

rahe sharīk-e-safar e'timād-e-ham-qadmī
ye kyā zarūr hai koī kisī ke saath chale

na ham-safar koī paayā na rāhbar chāhā
vo rāh-rau haiñ ki ham zindagī ke saath chale

safar ke saath safar ke na.e masā.il the
gharoñ kā zikr to raste meñ chhūT jaatā thā

safar-e-nasīb parindo! tumhāre hoñToñ par
ye ḳhush-gavār tarāne kahāñ se aate haiñ

rāste ā.īne bane paañv tamām rañg the
is pe bhī ye savāl vo kaise safar meñ gum huā

kaise bachchoñ ko batā.ūñ rāstoñ ke pech-o-ḳham
zindagī-bhar to kitāboñ kā safar maiñ ne kiyā

kyā batā.ūñ kaisā ḳhud ko dar-ba-dar maiñ ne kiyā
umr-bhar kis kis ke hisse kā safar maiñ ne kiyā

safar kā marhala-e-saḳht hī ġhanīmat thā
Thahar ga.e to badan kī thakan ziyāda huī

thake huoñ ko jo manzil kaThin ziyāda huī
safar kā azm-e-musammam lagan ziyāda huī

kyā safar thā be-sadā sadiyoñ ke pul ke us taraf us moḌ tak
pai-ba-pai ubhrā sunahrī gard se ik nāla-e-dil-gīr-e-dil

uḌe jo chiil to dekhe lahū kī jhiil meñ aks
shafaq Dhale to sharīk-e-safar na pahchāne

aage baḌhūñ to zard ghaTā mere rū-ba-rū
pīchhe muḌūñ to gard-e-safar mere sāmne

havas ki ziist kare rail ke safar kī tarah
safar ke ba.ad sharīk-e-safar na pahchāne

chamak rahā hai ufuq tak ġhubār-e-tīra-shbī
koī charāġh safar par ravāna ho gayā hai

ḳhud apne saath safar meñ rahe to achchhā hai
vo be-ḳhabar hai ḳhabar meñ rahe to achchhā hai

is ufuq par na agar jannat-e-mau.ūda milī
is ufuq tak bhī jo chāho to safar kar dekho

ye us kī raah nahīñ hai magar yūñhī 'bāqī'
vo mere saath safar kāTne ko aatā hai