Tags-Safar

aaj kyā be-ufuq rahegī shaam
be-sitāra safar rahegā kiyā

ham rūh-e-safar haiñ hameñ nāmoñ se na pahchān
kal aur kisī naam se aa jā.eñge ham log

roz ik raah na.ī shauq-e-safar māñgtā hai
dā.eroñ meñ hī simaT kar nahīñ qaa.em rahtā

jo saaya ham-qadam ban kar safar meñ saath rahtā thā
hamesha ke liye ḳhud se alag kal kar diyā maiñ ne

rah-e-junūñ meñ ḳhudā kā havāla kyā kartā
ye ḳhizr ranj-e-safar kā izāla kyā kartā

gard-e-safar meñ phuul se chehre utar ga.e
ā.īna un ko dekh ke hairān rah gayā

ab khalā apnī hī jānib ye safar hai ki yahāñ
fāsle aur baḌhe garmī-e-raftār ke saath

ham-nafas tum the tum hī dil-bar the
ham-safar tum the tum hī rahbar the

na jaane kaun apāhij banā rahā hai hameñ
safar meñ tark-e-safar kā ḳhayāl kyuuñ aayā

guftugū tark-e-ḳhāmushī hai faqat
ham-safar ek ajnabī hai faqat

charāġh-e-shauq jalā raat ke asar se nikal
safar na rok tilismāt-e-rahguzar se nikal

udaas lafzoñ ke rāste meñ ye raushnī kī lakīr kab thī
mohabbatoñ ke safar se pahle ġhazal kā lahja hī dūsrā thā

tumhārī ḳhushbū thī ham-safar to hamārā lahja hī dūsrā thā
ye aks bhī āshnā sā hai kuchh magar vo chehra hī dūsrā thā

ye safar dekhiye kahāñ ho tamām
misl-e-reg-e-ravāñ ravāñ huuñ maiñ

safar hai dhuup samundar kā aur jazīre sā
kahīñ kahīñ pe koī sā.ebāñ nikaltā hai

nazar meñ duur talak rahguzar zarūrī hai
kisī bhī samt ho lekin safar zarūrī hai

pairoñ se bāñdh letā huuñ pichhlī masāfateñ
tanhā kisī safar pe nikaltā nahīñ huuñ maiñ

Duub kar bhī jaarī rahtā hai safar
mehr maġhrib se chaḌhe mumkin nahīñ

ajab safar thā ajab-tar musāfirat merī
zamīñ shurū huī aur maiñ tamām huā

nipTeñge dil se ma.arka-e-rah-guzar ke ba.ad
leñge safar kā jā.eza ḳhatm-e-safar ke ba.ad