Tags-Safar

chakkar bañdhā thā paañv meñ qismat ke pher kā
gard-e-safar ke band abhī tak nahīñ dhule

baḌh ga.e haiñ is qadar qalb o nazar ke fāsle
saath ho kar ham-safar se ham-safar milte nahīñ

jāda-e-havādis meñ chal ke dekh le koī
kaise tai kiyā ham ne maut kā safar barsoñ

vaqt kī raftār se bhī tez chalnā hai mujhe
jā rahā huuñ ab havā ko ham-safar karte hue

is tarah āñkhoñ ko nam dil par asar karte hue
jā rahā hai kaun nezoñ par safar karte hue

ab aap rah-e-dil jo kushāda nahīñ rakhte
ham bhī safar-e-jāñ kā irāda nahīñ rakhte

ek lamha to dhaḌaktā hai zarūr
ka.ī sadiyoñ kā safar yaad nahīñ

nigah buland suḳhan dil-navāz jaañ pur-soz
yahī hai raḳht-e-safar mīr-e-kārvāñ ke liye

Thahar ga.e haiñ ain safar meñ bin soche-samjhe
ham-safarī ke kuchh be-nām qarīnoñ kī ḳhātir

raushnī meñ tirī raftār se kartā huuñ safar
zindagī mujh se kahīñ tez na chalne lag jaa.e

jo safar ke lutf kā andāza kar saktā nahīñ
ḳhush safar meñ rahne se lāchār hotā hai yahāñ

raah meñ chhāñv milī thī ki Thahar sakte the
is sahāre ko magar nañg-e-safar jaanā thā

log ruk ruk ke chale jānib-e-manzil lekin
ham rahe garm-e-safar gardish-e-daurāñ kī tarah

safar shabāb kā gar uzr thā to ab sar-e-shām
qazā-e-umr paḌheñ niyyat-e-namāz kareñ

jab zarā maañd ho thakan to 'hanīf'
mujh meñ phir jazba-e-safar jaage

ik safar hai mohabbatoñ kā jahāñ
paañv so jaa.eñ rahguzar jaage

baḌā hī ḳhauf lagā rahtā hai phisalne kā
safar hamārā abhī giilī rahguzar par hai

Thahar na aah mirī jaan le ke chalte ho
safar kare jo musāfir ko zād-e-rāh mile

terā saaya tere saath safar kartā hai
mere saath musalsal chaltī ḳhāmoshī hai

vo safar ko apne tamām kar, ga.ī raat ā.eñge lauT kar
ye 'nasīm' maiñ ne sunī ḳhabar to maiñ shaam hī se sañvar ga.ī