Tags-Safar

ajab safar thā mire us ke darmiyāñ 'qaisar'
ġhubār uḌtā rahā aur sitārā chaltā rahā

ḳhabar nahīñ ki safar hai ki hai qayām abhī
tilism-e-shahr meñ kho.e haiñ ḳhās-o-ām abhī

ye to ma.alūm hai maiñ samt-e-safar kho baiThī
tum isī baat ko andāz-e-digar se pūchho

agar na shab kā safar ho tire husūl kī shart
faroġh-e-mahr tirā e'tibār mar jaa.e

rahā sābit-qadam yuuñ hī agar azm-e-safar apnā
karegī ḳhud rah-e-dushvār hī āsāniyāñ paidā

kyā ḳhabar merā safar hai aur kitnī duur kā
kāġhzī ik naav huuñ aur tez-rau paanī meñ huuñ

Dar ham ko bhī lagtā hai raste ke sannāTe se
lekin ek safar par ai dil ab jaanā to hogā

patte kī khaḌak se bhī laraztā hai mirā dil
saa.e se bhī ḳhatra mujhe daurān-e-safar hai

kuchh yuuñ safar ke shauq ne manzar dikhā.e haiñ
manzil ke paas aa ke qadam laḌkhaḌā.e haiñ

na manziloñ ko na ham rahguzar ko dekhte haiñ
ajab safar hai ki bas ham-safar ko dekhte haiñ

safar qayām se behtar nahīñ rahā ab ke
ki jā-ba-jā the mirī raah meñ Thikāne bahut

shab kī dahlīz se us samt haiñ rāheñ kaisī
parda-e-ḳhvāb meñ ye kaisā safar rakkhā hai

sirf-o-azm-e-ātshīñ darkār hai
umr sargarm-e-safar ho jā.egī

hazār raah chale phir vo rahguzar aa.ī
ki ik safar meñ rahe aur har safar se ga.e

maiñ zindagī ke safar meñ thā mashġhala us kā
vo DhūñD DhūñD ke mujh ko gañvā diyā kartā

vo tā.ir-e-nigāh bhī safar meñ saath hai mire
ki jis kā zikr tak abhī kisī uḌaan meñ nahīñ

kahne ko rah-e-shauq meñ raahī to bahut the
manzil ko magar gard-e-safar ham ne kahā hai

haath ḳhālī haiñ magar mulk-e-adam kā hai safar
hausle dekhiye un be-sar-o-sāmānoñ ke

phir se darpesh safar kā qissa
ek TuuTe hue ghar kā qissa

baḌhe jitne raah meñ pech-o-ḳham huā aur jazb-e-safar baham
jo malāl the mire ham-qadam kahīñ thamne vaale malāl the