Tags-Safar

ishq janmoñ kā hai safar shāyad
ḳhatm hogā na umr bhar shāyad

pūchheñ to zarā pech-o-ḳham-e-rāh kī bāteñ
kuchh log abhī lauT ke aa.e haiñ safar se

aañkh thakan ne kholī hai yā azm-e-safar ne karvaT lī
par phailā kar baiThoge yā uḌne kī tayyārī hai

Tilism-e-ḳhvāb-e-zuleḳhā o dām-e-barda-farosh
hazār tarah ke qisse safar meñ hote haiñ

dasht-e-hairat ke safar meñ kab tujhe tanhā kiyā
ai junūñ maiñ bhī to huuñ ai ham-safar maiñ bhī to huuñ

'ḳhayāl' āmad-e-fasl-e-bahār hai shāyad
jo sust-e-gām the vo log bhī safar meñ haiñ

hisār-e-zāt se bāhar na apne ghar meñ haiñ
ham is zamīñ kī tarah mustaqil safar meñ haiñ

mujh ko in zindagī kī rāhoñ meñ
koī bhī ham-safar nahīñ miltā

ḳhudā kare na kabhī lazzat-e-safar kam ho
tamām-umr hameñ terī justujū hī rahe

vo dost saare the chaar pal ke jo chal diye ham-safar badal ke
'sahāb'-e-nādāñ vahīñ khaḌā hai usī Dagar par Thahar gayā vo

sabā ban kar abhī karne haiñ tai kitne safar ham ko
ham is miTTī kī ḳhushbū haiñ tilism-e-chāk se nikleñ

ye kār-e-be-samar hai agar kar liyā to kyā
ik dā.ere meñ ham ne safar kar liyā to kyā

safar tavīl sahī hāsil-e-safar kyā thā
hamāre paas ba-juz daulat-e-nazar kyā thā

andhā safar hai ziist kise chhoḌ de kahāñ
uljhā huā sā ḳhvāb hai tābīr kyā kareñ

ham the safar-nasīb so manzil se jā mile
jo sañg-e-mīl the vo zamīñ meñ gaḌe rahe

koī rahguzar ho kahīñ kā safar ho
maiñ har jā tire naqsh-e-pā chāhtā huuñ

duur kuchh saa.e se haiñ sahrā meñ
rāh-e-gum-karda ham-safar to nahīñ

ek hañgām hai bayābāñ meñ
koī āmāda-e-safar to nahīñ

chale the jis kī taraf vo nishān ḳhatm huā
safar adhūrā rahā āsmān ḳhatm huā

kyuuñ aise safar par nikle ho manzil nahīñ jis kī koī bhī
kyuuñ raah pe aisī chalte ho saa.e bhī jahāñ dīvār hue