Tags-Safar

ḳhayāl-e-gardish-e-shām-o-sahar meñ rahtā huuñ
maiñ ghar meñ rahte hue bhī safar meñ rahtā huuñ

mujhe qayām kahāñ ab mujhe talāsh na kar
hai merā naam musāfir safar meñ rahtā huuñ

rañg hī rañg thā shahr-e-jāñ kā safar
raah meñ jism kā hādsa bhī rahā

siyāh dasht kī jānib safar dobāra kiyā
na jaane qaaf kī pariyoñ ne kyā ishāra kiyā

huuñ shab-gazīda ġham-e-dil bichhaḌ ga.e tum bhī
mire sharīk-e-safar tum bachā sake na mujhe

pattharoñ ko hasīñ sūrateñ to milīñ dil nahīñ mil sakā
pattharoñ ko mile paañv par e'timād-e-safar kaun de

raushnī meñ tirī raftār se kartā huuñ safar
zindagī mujh se kahīñ tez na chalne lag jaa.e

sham-e-bīnā.ī muñDeroñ kā safar kartī rahī
dil uḌātā rahā āñkhoñ meñ basā.ī huī ret

hosh-o-ḳhirad bhī al-firāq ''bainī-va-bainaka'' kaheñ
hazrat-e-dil kā ḳhair se hai safar-e-hijāz-e-ishq

safar kaaTā hai kitnī mushkiloñ se
vahāñ saaya na thā paanī jahāñ thā

bichhā.ī hai jo kahīñ ishq ne bisāt apnī
kiyā hai us ne faqīroñ ko vāris-e-parvez

safar ye zindagī kā is qadar hai lāzim kyoñ
safar meñ ham haiñ magar ham meñ ye safar to ho

be-zabāñ bhī to batā detā hai manzil kā patā
tai karātā hai safar miil kā patthar ḳhāmosh

bargashta-baḳht dekh ki qāsid safar se maiñ
bhejā thā us ke paas so mere vatan gayā

ik na.ī dhuup meñ phir apnā safar jaarī hai
vo ghanā saaya faqat tifl-e-tasallī niklā

sharīk-e-shauq-e-safar hai agar vo merā 'nāz'
maiñ kyuuñ na mausam-e-gul kī bashāratoñ meñ rahūñ

pichhle safar kā aks-e-ziyāñ mere sāmne
sab bastiyāñ dhuāñ hī dhuāñ mere sāmne

tujhe ye be-sarfa jadd-o-kad hai kashākashī meñ bhī shadd-o-mad hai
nafas kī tujh ko agar madad hai safar hai is jā vatan ke andar

agar maiñ shab kī siyāhī na chiir kar niklūñ
koī ujālā mirā ham-safar nahīñ hotā