Tags-Safar

ye baat yaad rakheñge talāshne vaale
jo us safar pe ga.e lauT kar nahīñ aa.e

lambā safar thā ābla-pā.ī thī dhuup thī
maiñ thā tumhārī yaad kā saaya thā aur bas

na jaane kaun thā kis ajnabī safar par thā
vo qāfile se alag qāfile ke andar thā

āh-e-shab nāla-e-sahar le kar
nikle ham tosha-e-safar le kar

chāroñ khoñT phirā huuñ lekin apne aap ko pā na sakā
ghar aa kar ye raaz khulā hai samt-o-safar meñ kuchh bhī nahīñ

paañv phailā.e ham ne marqad meñ
chalte chalte thake safar hī to hai

ye ḳhvāb kā hai safar maiñ huuñ ḳhvāb-rū kī tarah
na ibtidā hī thī kuchh aur na intihā koī hai

sirf darvāze talak jā ke hī lauT aayā huuñ
aisā lagtā hai ki sadiyoñ kā safar kar aayā

jab tak sabā ne chheḌā na thā nik.hat-e-gulāb
kūcha-ba-kūcha mahv-e-safar is tarah na thī

maiñ havā kī tarah huuñ āvāra
tū merā ham-safar rahegā kyā

bas yūñhī tanhā rahūñgā is safar meñ umr bhar
jis taraf koī nahīñ jaatā udhar jaatā huuñ maiñ

uglā safar ho mere ḳhudā rāhatoñ bharā
jīvan kā ye safar mujhe achchhā nahīñ lagā

Thahro yahīñ ai qāfile vaalo aayā dasht-e-balā
us ne ye kah ke apne sar par ḳhāk-e-safar Daalī

naqsh āñkhoñ meñ utārā jā.egā
phir safar meñ din guzāra jā.egā

itne sukūñ se maiñ ne kiyā ishq kā safar
aayā nahīñ gumān kisī ehtimāl kā

haiñ marhale ajiib ye ishq-o-ḳhirad ke bhī
lamhoñ meñ kar rahī huuñ safar māh-o-sāl kā

ḳhushk āñkhoñ se ḳhushk dāman tak
ye safar gaam gaam dard kā hai

ab kisī andhe safar ke liye tayyār huā chāhtā hai
ik zarā der meñ ruḳhsat tirā bīmār huā chāhtā hai

is kashmakash meñ ḳhatm huā raat kā safar
zid thī mirī to us kī hayā kā savāl thā

nahīñ hotī hai rāh-e-ishq meñ āsān manzil
safar meñ bhī to sadiyoñ kī masāfat chāhiye hai