Tags-Safar

muddatoñ koī safar mumkin nahīñ
zindagī ko bhī Thikāna chāhiye

ye mirā zauq-e-safar hai varna aisī dhuup meñ
har qadam par ik shajar chhitnār rakh jaatā hai kaun

kitnī hī baar ḳhayāloñ meñ tire paas ga.e
ham-safar karte rahe vaqt-e-safar hone tak

tere saath apne bhī jiine kī duā.eñ māñgīñ
ham-safar saath rahe ḳhatm-e-safar hone tak

khule haiñ rāstoñ ke bhed tū samajh 'shāhīñ'
ye kārvāñ safar-e-rā.egāñ se niklegā

vaqfa hai zindagī to faqat chand roz kā
phir shahr-e-rañg-o-bū kī taraf ik safar bhī hai

andar kī samt hone lagā hai safar nayā
bāhar paḌā hai jo bhī nahīñ chāhiye hameñ

musāfir hue phir ik andhe safar ke
pata tai-shuda mausamoñ kā

kyā hukm aap kā hai mire vāste huzūr
jaarī safar rakhūñ ki Thahar jā.ūñ kyā karūñ

safar adam kā hai dushvār tū akelā hai
mujhe bhī saath liye chal sitāra-e-saharī

vo kaash maan letā kabhī ham-safar mujhe
to rāsto ke pech kā hotā na Dar mujhe

tujhe saath kaise maiñ le chalūñ maiñ safar pe huuñ kisī tuur ke
tire saath chaltī haiñ mastiyāñ tirī chaal mauj-e-chanāb hai

taqdīr-e-reg-e-shīsha-e-sā.at milī mujhe
kulfat safar kī raat din apne vatan meñ hai

hazīmatoñ ke safar kā raahī ufuq ko dekhegā bebasī se
ufuq se baḌhtā huā samundar zamīñ ko qadmoñ se khīñch legā

bartā gayā huuñ sirf kisī sair kī tarah
tuune mujhe safar kā irāda nahīñ kahā

ye aur baat ki is ahd kī nazar meñ huuñ
abhī maiñ kyā ki abhī manzil-e-safar meñ huuñ

ret kā ham libās pahne haiñ
aur havā ke safar pe nikle haiñ

ek muddat se haiñ safar meñ ham
ghar meñ rah kar bhī jaise beghar se

garm-e-safar hai garm-e-safar rah muḌ muḌ kar mat pīchhe dekh
ek do manzil saath chalegī paTke hue qadmoñ kī chaap

is zamīñ par kar rahā hai tai masāfat har-nafas
vo mubārak hai qadam jis kā safar meñ tez hai