Tags-Safar

ham tah-e-ḳhāk kiye jaañ kā araq un ke liye
aur pas-e-rāh-e-vafā gard-e-safar kahlā.e

kyā ḳhabar kaun se raste meñ vo rahzan mil jaa.e
apnā saaya bhī na ab saath safar meñ rakhiye

sitāra dekh ke niklī thī maiñ safar ke liye
magar sitāre ko taqdīr se inaad bhī thā

ye safar hai manzil-e-shauq kā koī ham-safar koī ham-rahī
kisī dil-shikasta ko saath le koī sargirāñ ho to le ke aa

bayān-e-shauq-e-safar ahl-e-dard kā hai bahut
magar nishān sar-e-rahguzar nahīñ miltā

sabhī haiñ khoī huī manziloñ kī gard meñ gum
safar bahut hai ma.āl-e-safar nahīñ miltā

guzar gayā vo zamāna vo zaḳhm bhar bhī ga.e
safar tamām huā aur ham-safar bhī ga.e

rotī āñkhoñ ko hañsāne kā hunar le ke chalo
ghar se niklo to ye sāmān-e-safar le ke chalo

jaane vaale ne abhī raḳht-e-safar bāñdhā hai
tum bhī ab zahr-e-judā.ī ko gavārā karnā

zarā sī der ko ruktā to hai safar lekin
kisī ke jaane se kab zindagī Thahartī hai

un paañv ke chhāloñ se pūchho ye batā.eñge
tai kaise kiyā ham ne sho.aloñ kā safar tanhā

safar meñ har qadam rah rah ke ye taklīf hī dete
bahar-sūrat hameñ in ābloñ ko phoḌ denā thā

DhūñDhtā hai jo bahar-gām na.ī raah yahāñ
vo musāfir bhī kabhī raḳht-e-safar kholegā

na fāsle ko na raḳht-e-safar ko dekhte haiñ
ajiib rañj se dīvār-o-dar ko dekhte haiñ

'bāqar' jo bhaTaktā hai ma.ānī ke safar meñ
ho sūrat-e-zebā to aTaktā bhī bahut hai

ashk āñkhoñ meñ agar kuchh haiñ to kar shab kā safar
rāste meñ āsmāñ baiThā hai jholī khol kar

jism thaktā nahīñ chalne se ki vahshat kā safar
ḳhvāb meñ naql-e-makānī kī tarah hotā hai

har qarz-e-safar chukā diyā hai
dasht aur nagar milā diyā hai

parind-e-fikr par haiñ saḳht kyuuñ us kī uḌāneñ
musāfir aaj be-samt-o-safar kyuuñ lag rahā hai

lamha lamha safar meñ rahtā hai
chāñd kab kis nagar meñ rahtā hai