Tags-Safar

sabhī musāfir chaleñ agar ek ruḳh to kyā hai mazā safar kā
tum apne imkāñ talāsh kar lo mujhe parinde pukārte haiñ

vaqt-e-safar ḳhamosh haiñ bosa-kinān-e-lab
un se kalām kījiye un ko rulā.iye

safar meñ shal hue jaate huuñ dhuup ke paañv
ufuq kī aañkh se bahtī huī hinā dekheñ

ye kyā safar hai ki sīdhe-sapāT raste haiñ
kabhī to ham koī pur-pech rāsta dekheñ

ḳhauf-e-tanhā.ī dikhātā thā ajab shakleñ so ham
apne saa.e hī ko apnā ham-safar kahne lage

'aḳhtar' dayār-e-husn meñ pahuñche haiñ mar ke ham
kyūñ-kar huā hai tai ye safar kuchh na pūchhiye

hai use duur kā safar dar-pesh
ham sambhāle nahīñ sambhalte haiñ

is bayābāñ kī nigāhoñ meñ muravvat na rahī
kaun jaane ki koī shart-e-safar phir Thahre

safar meñ aise ka.ī marhale bhī aate haiñ
har ek moḌ pe kuchh log chhūT jaate haiñ

dhyān ke gūñge safar se bhī nikal jā.ūñ magar
rāsta roke khaḌī hai saañs kī sarhad mirā

musāfiro abhī manzil ke haiñ paḌāv bahut
isī hisāb se zād-e-safar bhī rakhnā hai

rah-e-hayāt meñ thaknā bhī hai yaqīnī sā
phir apne aap ko vaqf-e-safar bhī rakhnā hai

tamām hāsil-e-ayyām jis safar meñ luTā
vo dāstan-e-safar umr-e-rā.egāñ se sunī

ab kaun sī matā-e-safar dil ke paas hai
ik raushani-e-sub.h thī vo bhī udaas hai

jaras hai un kā sadā un kī kārvāñ un ke
sivā.e gard-e-safar mere paas kyā hogā

kaThin hai rāhguzar thoḌī duur saath chalo
bahut kaḌā hai safar thoḌī duur saath chalo

'jauhar' ye ġham-e-rāh ye dushvārī-e-manzil
kahtā hai mirā dil ki qayāmat kā safar hai

rahrav se sarokār na manzil kī ḳhabar hai
dīvāna-e-ulfat hai ki sargarm-e-safar hai

kahīñ pe jism aur pahchān donoñ raah meñ chhoḌe
ḳhud apne aap ko ham ne na apnā ham-safar dekhā

paḌ ga.ī hai aadat ab saath tere chalne kī
bin tire kaTe kaise ye safar kī ḳhāmoshī