Tags-Safar

mire saath saath chale the sab mirā saath koī na de sakā
mire ham-safar mire ham-nazar mirī ḳhud-sarī mirī sar-kashī

is bulandī kā safar sahal nahīñ hai 'rāsiḳh'
har qadam rāh-e-mohabbat pe sambhal kar rakhnā

ik duur ke safar pe ravāna bhī huuñ 'zafar'
sust-ul-vajūd ghar meñ paḌā bhī huā huuñ maiñ

maiñ huuñ ġhazāl-e-mushk-gazīda merā safar hai tiir ke saath
jab hotī hai niiz ye ḳhushbū baḌhtī hai jaulānī aur

ranj-e-safar kī koī nishānī to paas ho
thoḌī sī ḳhāk-e-kūcha-e-dilbar hī le chaleñ

yuuñ kis tarah kaTegā kaḌī dhuup kā safar
sar par ḳhayāl-e-yār kī chādar hī le chaleñ

merā rahzan huā kyā kyā na pashemān ki jab
is ke naame mere asbāb-e-safar se nikle

ham ne tauhīn kī qayām kiyā
is safar meñ qayām thā hī nahīñ

rah-e-najāt meñ manzil kī justujū kis ko
ye vo safar hai ki jis meñ kabhī thakān na ho

kabhī merī talab kachche ghaḌe par paar utartī hai
kabhī mahfūz kashtī meñ safar karne se Dartā huuñ

rukā to raaz khulā kab se apne ghar meñ thā
ki merā ghar to mirī hālat-e-safar meñ thā

paañv meñ duur kā safar chamke
raat bastī meñ jab khañDar chamke

surāġh lā.egī kitne na.e jahānoñ kā
ye āgahī kā safar rā.egāñ rahegā koī

ik ranj-e-safar kī dhuul mire chehre pe gard-e-malāl huī
ik kaif jo sañgī sāthī thā us kaif kā saaya chhīn liyā

phir koī qāfila huā gard-e-safar meñ gum
phir aa rahī hai bāñg-e-darā jāgte raho

safar karnā hai āḳhir do palak beach
safar lambā hai base bistar na rahiyo

ek saaya saath mere ham-safar ban kar mirā
likh rahā hai phir koī taaza kahānī dhuup meñ

az-bas-ki is safar meñ manzil ko ham na pahuñche
āvārgī ne ham ko reg-e-ravāñ banāyā

sahl thiiñ marhala-e-tark-e-vafā tak rāheñ
is se aage koī pūchhe ki safar kaisā lagā

tirī āñkhoñ meñ āvāzeñ mire hoñToñ pe sannāTā
safar kī dāstāneñ kyā sunā.eñ ek jaisī haiñ