Tags-Safar

kab se ham log is bhañvar meñ haiñ
apne ghar meñ haiñ yā safar meñ haiñ

safar-ma.āb yahī bahr-o-bar hai phir bhī ham
paroñ ko apne kushā ḳhvāh-maḳhvāh kar na sake

ye umr bhar kā safar hai isī sahāre par
ki vo khaḌā hai abhī dūsre kināre par

safar kā nashsha chaḌhā hai to kyuuñ utar jaa.e
maza to jab hai koī lauT ke na ghar jaa.e

lamha-ba-lamha dam-ba-dam chaltā rahā qadam qadam
Dūbte chāñd kā safar kitnā aziiz thā mujhe

añdheroñ meñ bhī gum hotī nahīñ samt-e-safar apnī
nigāhoñ meñ firozāñ ik shabīh-e-māh rakhte haiñ

koī pūchhe rāhbar se raḳht-e-jāñ raḳht-e-safar
qāfila jaatā kahāñ hai be-sar-o-sāmān sā

jab safar tai kar liyā tab is kā andāza huā
dekhne ko rāsta to thā bahut āsān sā

jis se mansūb huā mere ḳhayāloñ kā safar
DhūñDne us ko mire saath havā bhī aa.ī

valvale jitne safar ke the safar itne na the
duur the raushan nagar ham se magar itne na the

unhīñ rāstoñ ne jin par kabhī tum the saath mere
mujhe rok rok pūchhā tirā ham-safar kahāñ hai

jo kahte haiñ kidhar dīvāngī hai
unhīñ kī ham-safar dīvāngī hai

safar kahne ko jaarī hai magar azm-e-safar ġhā.eb
ye aisā hai ki jaise ghar se hoñ dīvār-o-dar ġhā.eb

hazāroñ mushkileñ aa.iiñ vafā kī raah meñ mujh par
kabhī manzil huī ojhal kabhī rāh-e-safar ġhā.eb

be-sabab Thiik nahīñ ghar se nikal kar jaanā
justujū ho koī dil meñ to safar par jaanā

safar hai ḳhvāb meñ sahrā-e-jāñ kā
magar vo ham-safar merā nahīñ hai

safar hai aur hī darpesh mujh ko
ye musht-e-ḳhāk ghar merā nahīñ hai

safar meñ ye gumāñ hai har qadam par
ki mere saath koī chal rahā hai

māyūs 'mujīb' itnā bhī na ho laġhzish to gunāh-e-ādam hai
manzil kī talab to mohkam hai idrāk-e-safar mohkam na sahī

anjām-e-safar kyā honā hai ye faisla mustaqbil degā
maidānoñ pe vahshat aaj bhī hai rāhoñ ke vo pech-o-ḳham na sahī