Tags-Safar

vo jis kī raah meñ gumrāh ho gayā huuñ maiñ
vahī ḳhudā mirā samt-e-safar sambhālegā

apne markaz pe raqs kartī huī
ik musalsal safar hai ye duniyā

rūdād safar kī pūchhte ho
maiñ ḳhvāb meñ jaise chal rahī thī

nairañgī-e-siyāsat-e-daurāñ to dekhiye
manzil unheñ milī jo sharīk-e-safar na the

ham ahl-e-dil kā zamāna hī saath de na sakā
hameñ bhī dukh hai ki ham is safar meñ tanhā haiñ

sadiyoñ sadiyoñ merā safar
manzil manzil rāhguzar

maiñ aisā jāda-e-manzil guzishta huuñ jis ke
har ek sañg meñ zaḳhm-e-safar hai chāragaro

safar se kis ko mafar hai lekin ye kyā ki bas reg-zār aa.eñ
kahīñ koī sā.ebān bhī de ki gard-e-vahshat utaar aa.eñ

maiñ nahīñ haarā tū mere hausle kī daad de
ik nayā azm-e-safar is ḳhasta-sāmānī meñ hai

ye to ho saktā hai ki donoñ kī manzil ek ho
phir bhī us ke ham-safar hone kī farmā.ish na kar

safar meñ haiñ to hameñ yaad bām-o-dar kī hai
Thahar ga.e haiñ to phir aarzū safar kī hai

safar pīchhe kī jānib hai qadam aage hai merā
maiñ būḌhā hotā jaatā huuñ javāñ hone kī ḳhātir

vatan meñ apne ahl-e-shauq kī tarah
safar meñ roz-o-shab reg-e-ravāñ hai

ajzā-e-safar varta-e-hairat meñ paḌe haiñ
raftār abhī sāhib-e-raftār meñ gum hai

mire ham-safar baḌheñge mujhe rāsta batā kar
mire paañv se uḌī hai mire sar pe dhuul hogī

na koī dīvār-o-dar thā koī na ham-safar ham-suḳhan thā koī
bichārī kā koī ghar kahāñ thā ki kah deñ ham apne ghar ga.ī vo

mere safar meñ bhiiḌ jo thī ham-qadam mirī
yādoñ kī thī barāt koī kārvāñ na thā

koī safar sā safar thā koī thī baaT sī baaT
rah-e-hayāt pe do-gām chal na paayā maiñ

safar pe nikle to akasr bhaTak ga.e jānāñ
tumhārī yaad ke lashkar bhī maiñ bhī duniyā bhī

safar meñ marhaloñ kī rasm bhī hai ab bujhī bujhī
vahī purānī gard hai har ik na.e ġhubār meñ