Tags-Safar

isī sabab se to parchhā.īñ apne saath nahīñ hai
sa.ūbat-e-safar-e-shauq se niDhāl huī hai

na tū uzv-e-jāh pe faḳhr kar ki ye zindagī to hai ik safar
tujhe kyā ḳhabar are be-ḳhabar dabe paañv pīchhe qazā bhī hai

badan se jis kī thakan aaj tak nahīñ utrī
maiñ us safar pe ravāna kabhī huā hī na thā

dil nahīñ hai manzil-e-sīna meñ ab
yaañ se vo bechāra safar kar gayā

apnī aaheñ hī subuk-gām na hone deñgī
pā-ba-zanjīr chalo ḳhatm-e-safar hone tak

ham naqsh-e-pā the rāhguzar hī meñ rah ga.e
nikle safar pe aur safar hī meñ rah ga.e

manzil pe vo bhī pahuñcheñge kis ko yaqīn ho
pīchhe jo ibtidā-e-safar hī meñ rah ga.e

sharīk dauḌ meñ hue safar bhī aur qayām bhī
to raḳhsh-e-vaqt maiñ tirī rikāb se nikal ga.ī

sar pe jab saayā rahā koī na daurān-e-safar
us kī yādoñ ko phir apnā sā.ebāñ maiñ ne kiyā

ravāñ jo hai safar-e-manzil-e-sadā har-chand
ye qāfila mire me.aar se nahīñ ruktā

ḳhaak o ḳhuuñ kī vus.atoñ se bā-ḳhabar kartī huī
ik nazar imkāñ-hazār-imkāñ safar kartī huī

pahle tū āġhāz-e-safar kar phir tāroñ kī dūkānoñ se
baalī bunde jhumke paa.el le dūñgā maiñ kañgan bhī

mere hamrāh nahīñ tū jab se
ye safar ek sazā ho jaise

us lazzat-e-safar ko maiñ ab un se kyā kahūñ
jo sāya-hā-e-sarv-o-sanobar meñ rah ga.e

mujhe khaltī nahīñ tanhā.ī safar kī yuuñ bhī
guftugū karte haiñ sab raah ke patthar mujh se

hameñ dar-pesh thī naql-e-makānī
tirā hukm-e-safar aane se pahle

safar go vāpsī kā hai magar tū saath rah mere
mujhe ye ḳhauf hai mujh ko mirā saaya pakaḌ legā

har safar ke ba.ad vaisā hī safar rakkhā gayā
aur phir maqsūm merā dar-ba-dar rakkhā gayā

jānib-e-manzil safar meñ raushnī sī hai abhī
is añdherī raat meñ bhī chāñdnī sī hai abhī

kitne sūraj tum se pahle is safar meñ jal-bujhe
is jahān-e-tīra-ḳhātir par ubharnā dhyān se