Tags-Safar

kyā makr-o-fareb se Dareñ ham
haq baat hamārī ham-safar hai

maiñ sochtā huuñ magar yaad kuchh nahīñ aatā
ki iḳhtitām kahāñ ḳhvāb ke safar kā huā

kuchh TuuTe phaTe siine ko saath apne safar meñ
kyā vo bhī musāfir jo na rakkhe suī taagā

lagegī aag to samt-e-safar na dekhegī
makān shahr meñ koī nazar na aa.egā

guzre vaqt kī shāyad tujhe ḳhabar kam hai
mire safar meñ koī tujh sā ham-safar kam hai

ki ham-safar ko samajhne lagā ḳhizar apnā
zarūratoñ ne kuchh aisā safar diyā mujh ko

zulmat meñ bahut hī yaad aa.e
vo chāñd jo ham-safar rahe haiñ

rah-e-talab ke safar meñ 'ra.anā' sukūñ hai ḳhvāb-o-ḳhayāl yaksar
qadam qadam Thokareñ lageñgī nafas nafas barhamī milegī

luT gayā asbāb chhoḌā sab ne ghar
ab hai sahrā-e-musībat kā safar

safar safar mire qadmoñ se jagmagāyā huā
taraf taraf hai mirī ḳhāk-e-justujū raushan

saroñ pe apne tamāzat kā bojh uThā.e hue
ye kaun mahv-e-safar hai Dagar Dagar yūñhī

musāfir hai yahāñ saare ye duniyā ik safar hai
yahāñ ruknā hai kitnā jāntā huuñ maiñ kahāñ huuñ

manzil-e-ishq ke rāhbar kho ga.e
mere hamdam mire ham-safar kho ga.e

palañg par jo kitāb o sinān rakh degā
na.e safar ke liye kuchh nishān rakh degā

ek hī peḌ par saañp aur aadmī saath rahte haiñ sailāb utarne talak
ham-safar hai agar dushman-e-jāñ to kyā raah sunsān hai baat karte raheñ

phir koī tishna-lab tiir is dasht meñ ham tak aayā hai tai kar ke kitnā safar
ai rag-e-jāñ kī jū-e-ravāñ ham bhī kuchh mehmāñ kī mudārāt karte raheñ

maiñ ḳhud mustaqil huuñ safar meñ so mujh ko
ye lagne lagā hai thakan kuchh nahīñ hai

dam liyā thā na qayāmat ne hanūz
phir tirā vaqt-e-safar yaad aayā

guzishta ahl-e-safar ko jahāñ sukūn milā
na jaane kyuuñ hameñ un manziloñ pe ḳhuun milā

mujhe azīzān-e-man mohabbat kā koī bhī tajraba nahīñ hai
maiñ is safar meñ nayā nayā huuñ mujhe duāoñ meñ yaad rakhnā