Tags-Safar

āsān nahīñ hai ye safar ruuh kā 'saurabh'
haa.il hai tirī raah meñ ik dasht-e-badan bhī

kis kī talāsh hai hameñ kis ke asar meñ haiñ
jab se chale haiñ ghar se musalsal safar meñ haiñ

tire qurb ne jo baḌhā diye kabhī miT sake na vo fāsle
vahī paañv haiñ vahī aable vahī apnā zauq-e-safar bhī hai

ḳhayāl-e-nau se ulajhtā huā mirā ehsās
mirī ġhazal ke safar kā bayān ban baiThā

sidhārī manzil-e-hastī se kuchh be-e'tinā.ī se
tan-e-ḳhākī ko shāyad ruuh ne gard-e-safar jaanā

na.e sire se koī safar āġhāz nahīñ kartā
jaane kyuuñ ab dil merā parvāz nahīñ kartā

bahut dushvār thī rāh-e-mohabbat
hamārā saath dete ham-safar kyā

jinheñ māntā hī nahīñ ye dil vahī log mere haiñ ham-safar
mujhe har tarah se jo raas the vahī log mujh se bichhaḌ ga.e

jinheñ kar sakā na qubūl maiñ vo sharīk-e-rāh-e-safar hue
jo mirī talab mirī aas the vahī log mujh se bichhaḌ ga.e

tañgī rafīq-e-rah thī adam yā vajūd thā
merā safar ba-tāla-e-chashm-e-hasūd thā

thakan malāl udāsī safar kī nākāmī
ye ho qubūl to sargarm-e-justujū honā

koī dhun hai pas-e-iz.hār safar meñ jis ne
merī ġhazloñ kī fazā aur sī rakkhī huī hai

manzil to ḳhush-nasīboñ meñ taqsīm ho chukī
kuchh ḳhush-ḳhayāl log abhī tak safar meñ haiñ

har-chand gaam gaam havādis safar meñ haiñ
vo ḳhush-nasīb haiñ jo tirī rahguzar meñ haiñ

hijr bhī kam nahīñ hai dozaḳh se
is safar kā azaab aur hī hai

safar āsāñ nahīñ hotā kamar pe laad kar duniyā
chale to rafta rafta rah gayā asbāb raste meñ

kasmasāte haiñ paañv ke chhāle
hai abhī bhī koī safar baaqī

mirī tayyāriyāñ mere safar meñ ho ga.iiñ haa.il
kabhī ta.avīz baazū par kabhī mehrāb raste meñ

kuchh nazāre haiñ kuchh nazar baaqī
aur kuchh kos kā safar baaqī

rāheñ dhuāñ dhuāñ haiñ safar gard gard hai
ye manzil-e-murād to bas dard dard hai