Tags-Sahil

use tūfāñ kahūñ yā jān-e-sāhil kyā kahūñ 'shāhid'
na ubhre jazb ho kar ashk-e-dariyā-bār dāman se

Dūbne vaalī hai kyā kashtī-e-ummīd ai 'josh'
mauj taḌpī lab-e-sāhil pe duā.eñ aa.iiñ

apnī jagah sāhil sā Thahrā ġham terā
dil ke dariyā meñ ik halchal paiham sī

jaise sāhil se chhuḌā letī haiñ maujeñ dāman
kitnā saada hai tirā mujh se gurezāñ honā

phir sulā degā use bahr kā ik gahrā sukūt
mastī hai mauj meñ sāhil pe machal jaane tak

kis kī kashtī tah-e-girdāb-e-fanā jā pahuñchī
shor-e-labbaik jo 'fānī' lab-e-sāhil se uThā

mar jā.ūñ Duub kar 'sharaf' us paar yaar hai
kashtī na ho koī lab-e-sāhil to kyā karūñ

har taraf vahī andhā khel hai anāsir kā
tairtā chale sāhil Dūbtā chale dariyā

bādbānoñ ne har ik samt badal kar dekhī
koī manzar na nazar sūrat sāhil aayā

vo kashtī-e-dil hī Duub chukī jo ziist kā hāsil thī 'farhat'
ab rāhat-e-sāhil kuchh bhī nahīñ ab shorish-e-tūfāñ kuchh bhī nahīñ

sāhil ko mauj le ga.ī aur us ko bādbāñ
ḳhāvar ab is ke ba.ad na us paar dekhnā

baaz aa sāhil pe ġhote khāne vaale baaz aa
Duub marne kā maza dariyā-e-be-sāhil meñ hai

Dūbne vaalā thā aur sāhil pe chehroñ kā hujūm
pal kī mohlat thī maiñ kis ko aañkh bhar kar dekhtā

har tamāshā.ī faqat sāhil se manzar dekhtā
kaun dariyā ko ulaTtā kaun gauhar dekhtā

rishta mire sāhil-e-nafas se
is mauj-e-sarāb kā rahegā

sāmne kuchh der lahrāte rahe
phir vo sāhil bah ga.e dariyāoñ meñ

lahar ke sāmne sāhil kī haqīqat kyā hai
jin ko jiinā hai vo hālāt se Darte kab haiñ

ye maujoñ ke nahīñ ai nā-ḳhudā taqdīr ke bal haiñ
safīna ġharq ho kar dāman-e-sāhil se niklegā

ashkoñ kī sūrat āñkhoñ ke sāhil par
roz nayā ik lashkar aan utartā hai

ek ham haiñ ham ne kashtī Daal dī gardāb meñ
ek tum ho Darte ho aate hue sāhil ke paas